Túrkistanda usaq maldan brýtsellez tabylyp, eki aýylǵa shekteý engizildi

TÚRKІSTAN. QazAqparat – Túrkistan oblysynyń Qazyǵurt aýdanyndaǵy eki aýylda usaq maldan brýtsellez anyqtaldy. Osyǵan baılanysty eldi mekenderde shekteý sharalary jarııalandy, dep habarlaıdy QazAqparat tilshisi.

«Túrkistan oblysy Qazyǵurt aýdany Altyntóbe aýyldyq okrýgi Qarjan eldi mekeni Ó.Tileýbaev koshesi №1-17 úıleriniń aýmaǵynda usaq maldar arasynda brýtsellez aýrýynyń paıda bolýyna baılanysty shekteý is-sharalary belgilensin», - dep kórsetilgen atalǵan aýyldyq okrýg ákiminiń sheshiminde.

Sonymen qatar, Qazyǵurt aýdanyna qarasty Qyzylata aýylynda da shekteý jarııalandy.

«Túrkistan oblysy Qazyǵurt aýdany Sabyr Raqymov aýyldyq okrýgi Qyzylata aýyly Á.Dáýletuly kóshesindegi № 94, 95, 98, 101, 104, 106, 110, 111 úıleriniń aýmaǵyna múıizdi usaq maldarynan brýtsellez aýrýynyń shyǵýyna baılanysty shekteý is-sharalary belgilensin», - delingen ashyq talqyǵa shaǵarylǵan aýyldyq okrýg basshysynyń sheshiminde.

Eske salaı keteıik, buǵan deıin Soltústik Qazaqstan oblysyndaǵy Nadejka aýylynda iri qaradan brýtsellez anyqtalyp, eldi meken karantınge jabylǵan edi.

Sondaı-aq, bıylǵy jyldyń basynan beri Qostanaı oblysynda 8 adam brýtsellez aýrýyn juqtyrdy.