Túrkistanda Úndistan ýnıversıtetiniń fılıaly ashylady
Búgin Túrkistan oblysynyń ákimi Darhan Satybaldy AQSh-tyń AQSh Penn state (Pensılvanııa) ýnıversıtetiniń Túlekter baǵdarlamalary jáne halyqaralyq baǵdarlamalar jónindegi dekany Stıven Barnsty qabyldady. Kezdesýde ýnıversıtet fılıalyn ashý bastamasynyń alǵysharttary talqylanyp, áriptestikti nyǵaıtý joldary qaraldy.
«Qazirgi dáýir – tsıfrlandyrý dáýiri ekenin eskeretin bolsaq, óńir jastary úshin IT baǵyty boıynsha joǵarǵy oqý ornyn ashý qajettiligi bar. Sondyqtan, Túrkistan qalasynda IT ýnıversıtetiniń fılıalyn ashýdy qarastyrýdy usynamyn. Osy joba aıasynda oblys ákimdigi tarapynan barlyq qoldaý kórsetiledi, tıisti ınfraqurylymmen qamtamasyz etýge ázir ekenimizdi habarlaımyn. Biz turǵyndarymyzǵa zamanaýı oqý ordasyn ashyp, olardyń jan-jaqty damýyna jaǵdaı jasaýymyz kerek», - dedi Darhan Satybaldy.
Stıven Barns Túrkistannyń tarıhı ornyna toqtalyp, qalanyń damyp jatqanyna, óńir basshysynyń qurmetpen qabyldaǵanyna rızashylyǵyn bildirdi.
«Men Pensılvanııa ýnıversıtetinde jumys isteımin. Úndistandaǵy Ulttyq sot saraptamasy ýnıversıtetimen tyǵyz baılanystamyn ári quryltaıshylarymen birlese jumys atqaryp júrmin. Túrkistanǵa kelýdegi maqsatym – Úndistannyń sol jetekshi oqý ordalarynyń biriniń fılıalyn ashýǵa kómektesý. Jol, ǵımarat salý ońaı, biraq bilimdi urpaq tárbıeleý, sapaly bilim júıesin damytý – óte qıyn is. Túrkistanda oqý ordasynyń fılıalyn qysqa ýaqytta ashý múmkindigi bar ekenin kórip turmyn. Arnaıy ǵımaraty bólinse, ýnıversıtet óz fılıalyn ashýǵa, mamandaryn ýaqytsha jiberýge jáne qazaqstandyq oqytýshylardyń biliktiligin kóterýge daıyn», - dedi Stıven Barns.
Oblys ákimi Darhan Satybaldy kezdesý barysyndaǵy usynystar men sharttar tolyq saraptalyp, tıisti jumystar júrgiziletinin, halyqaralyq talapqa saı oqý ordasyn ashýǵa qoldaý kórsetiletinin jetkizdi.
QR Ǵylym jáne joǵarǵy bilim mınıstrliginiń jobalar jetekshisi Samǵat Ermekbaev bul bastamanyń mańyzy joǵary ekenine toqtalyp, tıimdi áriptestik ornaıtynyna senim bildirdi. Ýnıversıtet ókilderi kelissózderdi jalǵastyrý maqsatynda elimizge maýsym aıynda keledi dep josparlanyp otyr.
Aıta keteıik, ulttyq sot saraptamasy ýnıversıteti (National Forensic Sciences University) – Úndistandaǵy kıberqaýipsizdik, tsıfrlyq krımınalıstıka, sot saraptamasy salalary boıynsha álemdegi jetekshi oqý ordalarynyń biri. Oqý ordasy sot saraptamasy jáne krımınalıstıka salasyndaǵy 14 fakýltette kıberqaýipsizdik, tsıfrlyq krımınalıstıka baǵytyn qosa alǵanda 75 mamandyq boıynsha bilim beredi.
