Túrkistanda «Uly dala eli» ortalyǵynyń qurylysy 2020 jyly aıaqtalady
TÚRKІSTAN. QazAqparat - Túrkistanda 2020 jyly «Uly dala eli» ortalyǵy iske qosylady. Bul týraly qala ákiminiń baspasóz qyzmetinen málim etti, dep habarlaıdy QazAqparat.
«Túrkistan qalasy úshin 2019 jyl Jastar jyly ǵana emes, qurylys jylynyń qyzǵan shaǵy. Alyp qurylys alańyna aınalǵan oblys ortalyǵynda elimizdegi iri qurylys kompanııalary kıeli shahardy túletý jolynda kúndiz-túni ter tógýde. Sonyń biri - «BI Construction turkestan» kompanııasy. Merdiger mekeme bıylǵy jyldyń sáýir aıynan bastap «Uly dala eli» ortalyǵynyń qurylysyn júrgizýde. Nysan kelesi jyly tapsyrylady. Naqtyraq aıtsaq, Atyraý oblysy ákimdiginiń syıy - 2020 jyldyń qyrkúıek aıynda aıaqtalýy tıis», - delingen ákimdik aqparatynda.
Joba jetekshisi Aıgýl Bapıshevanyń aıtýynsha, 0,8 ga jerde boı kóterip jatqan ortalyqtyń aýmaǵy 6200 sharshy metrdi quraıdy. Qazirgi tańda qurylys jumystary josparǵa saı júrip jatyr.
