Túrkistanda uly aqyn Abaıdyń kórmesi ashyldy
ASTANA. QazAqparat - «Áziret Sultan» memlekettik tarıhı-mádenı qoryq-murajaıynda 4 mamyrda Abaıdyń «Jıdebaı-Bórili» tarıhı-mádenı jáne ádebı-memorıaldyq qoryq-murajaıynyń uıymdastyrýymen «Uly dala eliniń uly aqyny» taqyrybyndaǵy kórme ashyldy.
Kórmeni «Áziret Sultan» qoryq-murajaıy dırektory J.Áýbákir quttyqtaý sózimen ashyp, Semeıden, Shyńǵystaýdan kelgen mýzeı ujymyna alǵys bildirdi. Kórmeniń maqsaty uly tulǵa - aqyn oıshyl Abaı (Ibrahım) Qunanbaevtyń murasyn, onyń ómiri men shyǵarmashylyǵyn, qoǵamdyq qyzmetin nasıhattaý.
Semeı qalasynyń Mádenıet jáne tilderdi damytý bóliminiń bastyǵy B.Kópbaıuly Túrkistandaı kıeli topyraqqa taban tiregenine qýanyshty ekendigin jetkize kele, murajaılar arasyndaǵy baılanystyń aldaǵy ýaqyttarda da damı beretindigin atap ótip, «Áziret Sultan» murajaı ujymyna Semeı qalasyndaǵy táýelsizdik monýmenti kádesyıyn usyndy. Kórmeni ystyq yqylaspen qarsy alǵan Túrkistan jurtshylyǵy da óz lebizderin bildirýden aıanyp qalmady. Murajaı dırektory kelgen qonaqtarǵa alǵys hatpen qatar, «Áziret Sultan» qoryq-murajaıy atynan «Taıqazannyń» kóshirme kádesyıyn, Semeı qalasynyń Mádenıet jáne tilderdi damytý bóliminiń bastyǵy B.Kópbaıulyna Qoja Ahmet ıAsaýıdiń mórin estelik retinde usynyp, qonaqtarǵa babamyzdyń on bir Ahmettiń esimi jazylǵan kıeli mórin boıtumar retinde taqty.
Kórmege qatysqan qala ákiminiń keńesshisi J.Ibragımov tileginen keıin, qala ákimi Álipbek Óserbaevtyń alǵys hatyn tabys etti. Sondaı-aq kórmege aqsaqaldar keńesiniń múshesi M.Dúısekeı jáne qaladaǵy etnopedagogıkalyq kolledjdiń dırektory A.Serim de óz tarapynan estelik syılardy tartý etti. Kórmeniń ashylý saltanatyn № 16T.Bıgeldınov atyndaǵy jalpy orta mektebiniń oqýshylary Abaıdyń qara sózderin jáne óleńderin jatqa oqyp, kópshilikti bir serpiltip tastady. Kórmege qala mektepteri men kolledj stýdentteri, ata-analar, zııaly qaýym ókilderi qatysty.
Kórme bir aıǵa jalǵasady.
