Túrkistanda ulttyq sanany jańǵyrtý taqyrybynda respýblıkalyq konferentsııa ótti

ShYMKENT. QazAqparat - Túrkistan shaharyndaǵy «Əziret Sultan» memlekettik tarıhı qoryq-mýzeıinde Elbasy Nursultan Nazarbaevtyń «Bolashaqqa baǵdar: rýhanı jańǵyrý» baǵdarlamalyq maqalasy aıasynda respýblıkalyq konferentsııa ótti, dep habarlaıdy QazAqparat HAA tilshisi.    

Kóptegen tarıhshylar men ǵalymdardyń basyn qosqan jıyndy  atalǵan murajaı qyzmetkerleri men  Túrkistan qalalyq máslıhatymen birlese uıymdastyrdy. Konferentsııa jumysyna QR Ardagerler uıymy Ortalyq Keńesi tóraǵasynyń birinshi orynbasary Ómirzaq Ozǵanbaev, belgili aqyn, «Qazaqstannyń eńbek sińirgen qaıratkeri», «Qurmet» ordeniniń ıegeri Qasymhan Begmanov, Ál-Farabı atyndaǵy QazUÝ professory Beısen Nurzada, Qazaq ekonomıka, qarjy jáne halyqaralyq saýda ýnıversıtetiniń prorektory, professor Erjan Ámirbekuly, QR BǴM mektepke deıingi jáne orta bilim departamenti tárbıe jumysy jónindegi bilim berý basqarmasynyń basshysy Baǵymkúl Kóptileýova men birqatar ǵalymdar, Túrkistan qalalyq máslıhat depýtattary men qalalyq ardagerler keńesiniń tóraǵasy,  joǵary oqý oryndarynyń stýdentteri men BAQ ókilderi jáne mýzeı qyzmetkerleri qatysty.

Ataýly konferentsııada jınalǵandar Elbasynyń maqalasyndaǵy basymdyqtarǵa toqtala kele, sonyń ishinde ulttyq sanany damytý men jańǵyrtý, latyn alfavıtine kóshý, "Týǵan jer"  baǵdarlamasyn júzege asyrý syndy kóptegen máseleler oı talqyǵa salyndy.

«Bul  tarıhı mańyzy bar maqala - barlyq aımaqtyń ajaryn ashyp, jas urpaqtyń boıyna patrıottyq tárbıe sińiretin ıgi bastama» - dedi jıyn moderatory QR Ardagerler uıymy Ortalyq Keńesi tóraǵasynyń birinshi orynbasary Ómirzaq Ozǵanbaev.

Keleli otyrys barysynda kóptegen pikirler bildirilip, jastar da ózindik oılaryn ortaǵa saldy.