Túrkistanda «Ulttyq qundylyqtardy damytý tujyrymdamasy» talqylandy

TÚRKІSTAN. QazAqparat – Búgin Túrkistan qalasynda «Aýyl» halyqtyq-demokratııalyq patrıottyq partııasynyń «Ulttyq qundylyqtardy damytý tujyrymdamasy» talqylandy. Basqosýda ulttyq bolmysty saqtaý men otbasylyq qundylyqtardy qorǵaý, memlekettik til men rýhanı damý máseleleri sóz boldy, dep habarlaıdy QazAqparat tilshisi.

«Aýyl» halyqtyq-demokratııalyq patrıottyq partııasy Saıası keńesiniń músheleri men zııaly qaýym ókilderi, ǵalymdar men qoǵam qaıratkerleri osynaý ózekti máselelelerdi keńinen talqylap ótti. Partııanyń tujyrymdamasyn sóz etken aǵa býyn ókilderi otbasy tárbıesi men ata-analardyń jaýapkershiligin kúsheıtý máselesin kóterip, qazirgi qoǵamdaǵy otbasylyq qundylyqtardyń quldyrap bara jatqanyn jetkizdi. Bul baǵytta atqarylýy tıis naqty sharalardy atap kórsetti. Memlekettik tildiń qoldaný aıasyn keńeıtý maqsatynda qolǵa alynatyn is-sharalardy tujyrymdamanyń negizgi baǵytyna aınaldyrý kerek degen usynystaryn ortaǵa saldy. Sonymen qatar qazirgi tańda jahandanýdyń áserimen kómeskilenip bara jatqan etno-mádenı muralarymyzdy saqtaý máselesi de partııa tujyrymdamasynyń negizgi baǵyttarynyń biri bolmaq.

«Tujrymdamada kúndelikti turmys-tirshilikke qatysty máseleler qamtylyp otyr. Sonyń ishinde túrli toı-jıyndar ótkizýge, asyra silteýshilik pen ysyrapshyldyqqa qarsy nárselerdi bir yqshamdaý máselesi qamtylǵan. Sol sııaqty 18-19 tarmaǵymyz, usynystarymyz bar. Solardyń barlyǵy tıisti organdarǵa joldanatyn bolady»,- dedi partııanyń tóraǵasy, senator Álı Bektaev.

Shara aıasynda qatysýshylar sondaı-aq, Arystanbab pen Qoja Ahmet ıAsaýı kesenelerine zııarat jasap, quran baǵyshtady.