Túrkistanda «Ulttyq dombyra» kúni atalyp ótti
TÚRKІSTAN. QazAqparat - Túrkistandaǵy «Áziret Sultan» memlekettik tarıhı-mádenı qoryq-mýzeıiniń» uıymdastyrýymen Elordamyz Astana qalasynyń 20 jyldyq mereıtoıy jáne Ulttyq dombyra kúni merekesine oraı «Uly Dala shejiresi -dombyra» atty lektsııa - kontsert ótti, dep habarlaıdy QazAqparat tilshisi.
Mádenı sharaǵa elimizge belgili aıtysker aqyndar men dombyrashy ónerpazdar, ulttyq-mádenı ortalyq jetekshileri men zııaly qaýym jáne jergilikti BAQ ókilderi qatysty.
Aıta keteıik, Elbasy Nursultan Nazarbaev bıyldan bastap ár shildeniń alǵashqy jeksenbisin «Ulttyq dombyra» kúni dep jarııalaǵan bolatyn. Elbasy Jarlyǵynda aıtylǵan másele - ulttyq dástúr men ónerdi jańǵyrtyp, dáripteýge jol salady. Jıyn barysynda «Áziret Sultan» memlekettik tarıhı-mádenı qoryq-mýzeıiniń dırektory Nurbolat Ahmetjanov sharaǵa kelgen barsha qonaqtardy «Ulttyq dombyra» kúnimen quttyqtap, ulttyq ónerdi jalǵastyrý men qasıetti dombyrany serik etken ónerpazdarǵa tilegin bildirdi. Al, mýzeıdiń bas redaktory dombyra týraly baıandama oqyp, ulttyq aspaptyń erekshelikteri men shyǵý tarıhyna toqtaldy.
Dombyrashylar basqosýynda Túrkistan qalalyq «Óner» mektebiniń jas ónerpazdary «Dombyranyń shattyq úni» jáne «Erke sylqym» kúılerin oryndady. Sondaı-aq «Alystan qyzyl kórinse», «Ólsheýli ómir», «Jaqsy men jaman» termelerin jáne «Ózim týraly» atty tolǵaýlaryn shyrqap, kópshiliktiń qoshemetine bólendi.
Budan bólek, Kentaý qalasynyń Qurmetti azamaty, Kompozıtorlar Odaǵynyń múshesi Álimbek Qonysbekov «Qarataý shertpesi», «Saltanat» jáne «Óttiń dáýren» kúılerin shertti.
Túrkistan qalalyq «ıAssy» halyqtyq-folklorlyq ansambli «Bozingen», «Ata tolǵaýy», «Adaı», «Baqtybaıdyń áýeni» sııaqty kúılerimen kópshilikke erekshe áser qaldyrdy.
Halyqtyń suraýy boıynsha «Áziret Sultan» memlekettik tarıhı-mádenı qoryq-mýzeıiniń basshysy da Qurmanǵazynyń «Balbyraýyn» kúıin oryndap, qonaqtardyń aıryqsha yqylasyna bólendi.
Shara sońynda barsha ónerpazdarǵa mýzeıdiń baspa ónimderi syıǵa tartyldy.
