Túrkistanda «Ulttyq arheologııanyń sardary - Álkeı Marǵulan» atty kórme ashyldy

TÚRKІSTAN. QazAqparat - Túrkistanda «Ulttyq arheologııanyń sardary- Álkeı Marǵulan» atty kórme ashyldy. Atalǵan shara «Áziret Sultan» memlekettik tarıhı-mádenı qoryq-mýzeıinde «18 mamyr - Halyqaralyq mýzeıler» kúnine jáne kórnekti ǵalym-shyǵystanýshy, ádebıettanýshy, Qazaqstan arheologtarynyń ǵylymı mektebiniń negizin salýshy Álkeı Marǵulannyń 115 jyldyǵyna oraı uıymdastyryldy, dep habarlaıdy QazAqparat tilshisi.

Kórmege ǵalym-arheolog, bilikti ustaz, QR mádenıet qaıratkeri - Nurtaza Aldabergenov pen ózge de belgili ǵalym, arheologtar, mýzeı qyzmetkerleri men stýdentter, BAQ ókilderi qatysty. Saltanatty sharaǵa kelgen qonaqtar ilimge toly ustaz ónegesi jaıly estelikterimen bólisip, aqyndyq qyryna da toqtaldy. Al, Nurtaza Aldabergenov qazaq basylymdarynda jaryq kórgen Álkeı Marǵulannyń óleńderin qoryq-mýzeı qoryna tabystady. Jıynda sóz sóılegen "Áziret Sultan" memlekettik tarıhı-mádenı qoryq-mýzeıiniń dırektory Nurbolat Ahmetjanov kórnekti ǵalym-shyǵystanýshynyń eńbekterin atap ótti.

«Álkeı Marǵulan - Qazaqstandaǵy arheologııa mektebin qurýshy. Ol tarıh, arheologııa, etnografııa, ádebıet, óner jáne metallýrgııa salasyna qatysty 300-den astam ǵylymı zertteý jumystaryn, 100-den asa entsıklopedııalyq maqalalar jazǵan. Sonymen qatar, qazaqstandyq etnograftardyń, arheologtardyń, tarıhshylardyń birneshe býynyn daıarlap artynda óshpes iz qaldyrdy»,-dedi Nurbolat Ahmetjanov .

Kórmege qatysýshylar ekspozıtsııalardyń arasynan belgili ǵalym Álkeı Marǵulanǵa qatysty kitaptar, ǵylymı eńbekter, baspa ónimderi jáne fotosýretter men arheologııalyq qazba jumystarynan tabylǵan jádigerlerdi tamashalady.