Túrkistanda ýlanyp kóz jumǵan otbasynyń sýretin taratýshylarǵa qatysty tergeý júrgizilip jatyr
TÚRKІSTAN. QazAqparat - Túrkistan oblysy Keles aýdanyndaǵy Besqubyr aýylynda bir otbasy tabıǵı gazben janatyn peshtiń aqaýy saldarynan ýlanyp kóz jumdy, dep habarlaıdy QazAqparat.
Keshe keshke saǵat 16:30- shamasynda Qoshqar ata aýylyndaǵy jeke úılerdiń birinen 1986 jylǵy er adam men onyń 1993 jylǵy kelinshegi, eki balasynyń máıiti tabyldy.
«Oqıǵa orynda bolǵan Keles aýdandyq Tótenshe jaǵdaılar bóliminiń alǵashqy tekserý barysynda pesh murjasy kúıgen kirpish jáne qam kirpishpen aralasyp, laı sylaǵymen qalanǵany anyqtaldy. Murjanyń kirpishteri (negizi) shatyrdan aqqan sýdyń nátıjesinde ylǵaldanyp, turaqtylyǵyn joǵaltyp, ishine qaraı qulap, tútin shyǵatyn joldy bitep qalǵan», - delingen TJB habarlamasynda.
Qazir arnaıy saraptamalar taǵaıyndalǵan.
Aıta keterligi, Keles aýdandyq polıtsııa bólimi qaıtys bolǵan otbasynyń foto-vıdeosyn áleýmettik jeli men messendjerlerde jarııalamaý kerektigin eskertedi. Oǵan QR Qylmystyq Kodeksiniń 147- babynyń 5 - tarmaǵyna sáıkes jeti jylǵa deıin bas bostandyǵynan aıyrý jazasy qarastyrylǵan. Polıtsııa osyndaı sýretti jarııalaǵandarǵa ony óshirý jáne ary qaraı taratpaýdy suraıdy.
Qazir atalǵan oqıǵa boıynsha polıtsııa bólimimen tekserý amaldaryn bastady jáne ruqsat etilmegen sýret-vıdeo taratýshylardy anyqtaý jumystary júrgizilip jatyr.
«Keles aýdanynyń ákimdigi oryn alǵan oqıǵaǵa oraı otbasynyń aǵaıyn-týystaryna qaıǵyra otyryp, kóńil aıtady. Sonymen qatar, ákimdik tarapynan tıisti kómek kórsetý jumystary uıymdastyrylýda», - delingen aýdany ákiminiń baspasóz qyzmetiniń taratqan habarlamasynda.
