Túrkistanda ýlanyp kóz jumǵan 5 adamnyń ólimi: Kúdikti ustaldy
TÚRKІSTAN. QazAqparat - Túrkistan oblysynda bir otbasynyń 5 múshesiniń gazdan ýlanyp kóz jumý oqıǵasyna qatysty, kúdikti ustaldy. Bul týraly QazAqparat Polıtsııa departamentine silteme jasap habarlaıdy.
Polıtsııa qyzmetkerleri bolǵan oqıǵanyń aýyrlyǵy men qoǵamdyq rezonans týdyrýyna baılanysty jedel-tergeý sharalaryn atqardy. Onyń ishinde saraptamalar taǵaıyndalyp, kýágerlerden jaýaptar alynyp, qajetti degen barlyq jumystar júrgizildi.
«Ýly gazdan bir otbasynyń bes birdeı múshesi qaza bolyp, bizdiń oblysta úlken rezonans týdyrdy. Búgingi tańda bul qylmysty jasady degen kúdiktilerdiń biri Túrkistan qalasynyń turǵyny ustaldy. Ol gaz ornatý fırmalarynyń birinde dırektor. Tııanaqty júrgizilgen tergeý jumystarynyń aıasynda onyń iske qatysy bar ekeni dáleldendi. Biz kúdiktiler sanynyń artýyn joqqa shyǵarmaımyz. Sondyqtan tergeý jalǵasady», - dep atap ótti TO Polıtsııa departamenti Tergeý basqarmasynyń bastyǵy Nurmahan Jalǵasov.
Esterińizge sala keteıik, aqpan aıynyń sońynda Túrkistan qalasyndaǵy jer úılerdiń birinde bes adam, ıaǵnı áıel men onyń tórt balasy qaza tapqan. Oqıǵa baılanysty arnaıy komıssııa quryldy. Tergeý barysyn Túrkistan oblysynyń ákimi Ómirzaq Shókeev jeke baqylaýyna aldy. Oqıǵaǵa qatysty qylmystyq is qozǵaldy.
