Túrkistanda úkimettik emes uıymdarynyń VIII Azamattyq forýmy ótti

QazAqparat - Búgin Túrkistan oblysy  ishki saıasat basqarmasynyń uıymdastyrýymen Túrkistan oblysy úkimettik emes uıymdarynyń oblystyq VIII Azamattyq forýmy ótti. Eki jylda bir ret uıymdastyrylatyn atalmysh forým - qoǵamdyq uıymdar men bılik ókilderiniń arasyndaǵy ózara yntymaqtastyq pen is-qımyl júrgizý úshin qurylǵan suhbat alańyna aınaldy, dep habarlaıdy QazAqparat tilshisi.

Forým aıasynda «Úkimettik emes uıymnyń uıymdyq damýy» jáne «Jastar uıymdarynyń azamattyq qoǵamdy damytýdaǵy róli, sondaı-aq "Eriktiler qozǵalysyn damytý» taqyryptarynda plenarlyq sektsııalar ótti. Budan ózge dástúrli sharada memlekettik saıasatty júzege asyrýdaǵy qoǵamnyń Úkimettik emes sektory men memlekettik organdarmen qarym-qatynasyn damytý máseleleri sóz boldy. Basqosýda «Qasıet» qoǵamdyq birlestiginiń tóraıymy Gúlsim Andabaeva men «Jalyn» jastar uıymy» qoǵamdyq birlestiginiń tóraǵasy Qurmet Kerimbekov plenarlyq sektsııanyń tizginshisi retinde  úkimettik emes uıymdardyń, qoǵamdyq birlestikterdiń múshelerimen birge óz oı-pikirlerin, usynystaryn ortaǵa saldy. «Osy baǵytta qandaı jumys jasaý qajet? Qoǵam damýyndaǵy úkimettik emes uıymdardyń róli?»sekildi saýaldarǵa jaýap izdedi.

Sondaı-aq, jıynǵa Túrkistan oblysy ákimdigine qarasty memlekettik basqarmalarynan spıkerler arnaıy kelip, memleket tarapynan jasalynyp jatqan áleýmettik jobalardyń sıpattamasyna, onyń jastarǵa tıimdiligine toqtaldy. Jastar bolashaǵyna beı-jaı qaramaıtyn qoǵamdyq birlestikter men úkimettik emes uıymdar spıkerlerge «Jastar uıymdarymen qandaı áriptestik baılanystar bar? Atalmysh uıymǵa qandaı usynys beriledi? Forým barysynda nendeı pikirler aıtylmaq?» syndy birqatar saýaldarǵa jaýap aldy.

Plenarlyq sektsııa barysynda aıtylǵan usynystar hattamaǵa jazylyp, tıisti oryndarǵa joldanatyn boldy.