Túrkistanda túıe súti qurǵaq tabletka bolyp daıyndalady
Kezdesý barysynda «Golden Camel» zaýytynyń jumys barysy talqylandy. Túıe sútin óńdeý maýsymdyq jumys bolǵandyqtan, ınvestorlar aldymen, daıyndyq jumystaryn bastaıdy. Al tehnıkalyq tekseristen ótkennen keıin bir aıda zaýyt iske qosylady.
«Túrkistanǵa kelgenime biraz jyl boldy. Osynda jańa is bastap, jumys istedik. Sondyqtan men úshin Túrkistan árqashan ystyq. Osy joly zaýytty qaıtadan iske qosý úshin kelip otyrmyn. Tehnıkalyq tekserý jumystarynan keıin jaqyn arada kásiporyndy iske qosýǵa daıynmyn. Túıe sútinen tabletka shyǵarýdy qolǵa alamyz. Eshki súti Túrkistan oblysynda úlken suranysqa ıe. Sondyqtan osy baǵytta da jumystardy jandandyrýǵa daıynbyz», – dedi «Golden Camel group LTD» tóraǵasy ıAn Djı.
Táýligine 100 tonna túıe men bıe sútin óńdeıtin «Golden Camel group LTD» zaýytyna 7 mlrd teńgeden astam ınvestıtsııa quıylǵan. Munda ulttyq sýsyndy sońǵy protseske deıin óńdep, kosmetıkalyq ónimder men turmystyq hımııalyq suıyqtyqtar da shyǵarady. Ónimniń basym bóligi shet el memleketterine eksporttalady. Jobany iske asyrý Túrkistan men kórshi Qyzylorda, Jambyl oblystarynda túıe sharýashylyǵyn damytýǵa jáne mal basyn arttyrýǵa múmkindik beredi.
