Túrkistanda TÚRKSOI Turaqty keńesiniń otyrysy ótti
Keńeske TÚRKSOI Bas hatshysy Dúısen Qaseıinov, QR Mádenıet jáne sport mınıstri Arystanbek Muhamedıuly, Ońtústik Qazaqstan oblysynyń ákimi Janseıit Túımebaev pen Túrkııa Respýblıkasynyń Mádenıet jáne týrızm mınıstri Nýman Kýrtýlmýsh qatysty. Sondaı-aq keńeske Qyrǵyz Respýblıkasynyń Mádenıet, aqparat jáne týrızm mınıstri Sultanbek Jumaǵulov pen TÚRKSOI múshe elderdiń mádenıet mınıstrlikteriniń ókilderi, mádenıet qaıratkerleri arnaıy shaqyryldy.
Jıynda sóz alǵan oblys ákimi Janseıit Túımebaev túrki mádenıetin álemge tanytatyn halyqaralyq deńgeıdegi turaqty keńestiń mańyzdylyǵyna toqtaldy.
«Túrki tildes memleketterdiń basyn biriktiretin TÚRKSOI halyqaralyq uıymy aıasyndaǵy keńeste aıtylatyn pikirler men usynystar ortaq qundylyqtarymyzdy ulyqtaýǵa baǵyttalatyny sózsiz. Osy rette túpki maqsaty Túrki dúnıesi halyqtarynyń ortaq ótkeni men tarıhynyń, tili men ádebıetiniń, mádenıeti men óneriniń dáriptelýin kózdegen basqosýymyzdyń bolashaq urpaqqa mura bolatynyna kámil senemin»,- dedi oblys ákimi. 
Halyqaralyq uıymyna múshe Mádenıet mınıstrleriniń dástúrli kezdesýinde TÚRKSOI-dyń ótken jylǵy atqarǵan esebi tyńdalyp, 2017 jyly Túrki halyqtarynyń mádenı-rýhanı baılanystaryn nyǵaıtý jolynda atqarylǵan sharalar talqylandy.
Sonymen birge, uıymnyń aldaǵy jylǵa arnalǵan jospary maquldandy. Alqaly jıyn nátıjesinde qatysýshylar TÚRKSOI turaqty Keńesiniń HHHV otyrysynyń Deklaratsııasy men jumys hattamasyn qabyldap, qol qoıdy. 
