Túrkistanda Túrkııa ınvestıtsııalarynyń qatysýymen 15 joba iske asady

TÚRKІSTAN. QazAqparat- 2020- 2021 jyldar aralyǵynda Túrkistan oblysynda túrik ınvestıtsııalarynyń qatysýymen 493,7 mıllıon AQSh dollary kóleminde 15 ınvestıtsııalyq jobany júzege asyrý jáne 5 myńǵa jýyq jumys ornyn qurý josparlanýda. Bul týraly Túrkistan oblysynyń ákimi Ómirzaq Shókeev Túrkııa memleketiniń 41 eń iri holdıngteriniń basshylary qatysqan kezdesýde aıtyldy, dep habarlaıdy QazAqparat tilshisi.

«Túrkııa men Túrkistandy ejelgi tarıhı tamyrlar men rýhanı kózqarastar baılanystyrady. Búgingi tańda Túrkııa - Túrkistan oblysynyń, jalpy Qazaqstannyń mańyzdy, strategııalyq jáne senimdi seriktesi. Osyǵan baılanysty men Túrkistandy damytýdaǵy qazaq-túrik yntymaqtastyǵynyń mańyzdylyǵyn atap ótkim keledi. Bizdiń qalada halyqaralyq áýejaı men basqa da mańyzdy nysandardyń qurylysyna dál túrik kompanııalary qatysýda», - dedi Ómirzaq Estaıuly Ystanbulda ótken qazaq-túrik bıznes-forýmynda.

Túrkistan oblysynan barǵan delegatsııany oblys ákimi Ómirzaq Shókeev bastady. Forýmda elimizdiń ınvestıtsııalyq múmkindikteri tanystyrylyp, energetıka, mashına jasaý, hımııa, taý-ken, metallýrgııa jáne toqyma ónerkásibi, aýyl sharýashylyǵy, ınfraqurylym jáne qarjy salalaryndaǵy yntymaqtastyqty kúsheıtý máseleleri talqylandy.

Túrkistan qalasynda baýyrlas memlekettiń qoldaýymen halyqaralyq áýejaıdan bólek ónerkásiptik jylyjaı salý jáne daıyn metall buıymdaryn shyǵarý men týrızm baǵytyndaǵy kolledj qurý sııaqty iri jobalar qolǵa alynǵan.

Forým aıasynda Túrkistan oblysynyń ákimi túrik kapıtalynyń qatysýymen Shyǵys bazary, saýda ortalyǵy men qonaq úılerdiń qurylysy, tómen voltty kabelder shyǵarý boıynsha 3 memorandýmǵa qol qoıdy. Sembol Construction, Ta Group jáne KastroKablo kompanııalarymen qol qoıylǵan memorandýmdardyń jalpy somasy 200 mıllıon AQSh dollaryn quraıdy.

Sondaı-aq forýmda G2B formatynda túrik bıznesiniń 30-dan astam kásipkerleriniń qatysýymen iskerlik kezdesýler ótti. Túrik ınvestorlary Túrkistan oblysynyń týrıstik jáne ónerkásiptik salalaryna ınvestıtsııa salýǵa nıet bildirip otyr.

Yntymaqtastyqty kúsheıtý jáne ári qaraı jalǵastyrý maqsatynda túrik kompanııalarynyń Túrkistan oblysyna sapary kútilýde. Túrik kompanııalarynyń Qazaqstandaǵy ınvestıtsııalyq jobalarǵa degen qyzyǵýshylyǵynyń ósip kele jatqanyn atap ótken jón. Máselen, 2019 jyly Qazaqstanda túrik ınvestorlarynyń qatysýymen jalpy quny 2,9 mlrd dollardy quraıtyn 18 joba iske qosylǵan.

Eske salsaq, Ystanbul qalasynda QR Premer-Mınıstri Asqar Mamınniń, Túrkııa Respýblıkasynyń vıtse-prezıdenti Fýat Oktaıdyń, ulttyq kompanııalar, damý qorlary men saýda palatalarynyń basshylary, joǵarǵy bılik ókilderi jáne eki el kásipkerleriniń qatysýymen qazaq-túrik bıznes-forýmy ótken bolatyn.