Túrkistanda túrkitildes ulttar arasyndaǵy opera juzdyzdarynyń án festıvali ótti
ShYMKENT. QazAqparat - «Túrkistan - Túrki áleminiń mádenı astanasy» jylynyń aıasynda Túrkistanda Qazaqstannyń Halyq ártisi, ánshi Jamal Omarovanyń 105 jyldyǵyna arnalǵan XX-shy TÚRKSOI Halyqaralyq Opera juldyzdarynyń festıvali ótti, dep habarlaıdy QazAqparat tilshisi.
Esimhan alańynda uıymdastyrylǵan halyqaralyq sharany Ońtústik Qazaqstan oblysynyń mádenıet basqarmasynyń basshysy Nurbolat Ahmetjanov pen Túrkistan qalasynyń ákimi Álipbek Óserbaev ashty.
Festıvaldy uıymdastyrýshylar bul sharanyń túrki elderiniń ulttyq operalaryn jańǵyrta otyryp birligin nyǵaıtýǵa, túrki elderiniń qazirgi zaman opera óneriniń jarqyn ókilderin tanystyrý men olardyń shyǵarmashylyǵyn keńinen nasıhattaý maqsatynda ótkizilgenin aıtady. Túrkitildes ulttar arasyndaǵy baýyrlastyq baılanystar men dostyqty nyǵaıtý jáne túrkilik mádenıet pen ónerdi urpaqtan urpaqqa jetkizýdi kózdeıdi.
Opera juldyzdarynyń basyn qosqan sharada Túrkııa, Qyrǵyzstan, Ózbekstan memleketteriniń jáne Astana, Almaty, Shymkent qalalarynyń opera juldyzdary óner kórsetti. Atap aıtqanda, Qyrǵyzstannyń eńbek sińirgen ártisi Ásel Bekbaeva, Qaraqalpaqstannyń eńbek sińirgen ártisi Jeńisbek Pııazov, Túrkııa memleketinen Halyqaralyq baıqaýlardyń laýreaty Chaner Akgıýn, Ózbekstannan Halyqaralyq baıqaýlardyń laýreaty Nemat Habıbov, Astana Opera teatrynyń solısi, QR eńbek sińirgen qaıratkeri Jan Tapın, Almaty qalasyndaǵy Abaı atyndaǵy Qazaq memlekettik akademııalyq opera jáne balet teatrynyń jetekshi solısteri, QR Memlekettik syılyǵynyń ıegeri Talǵat Kúzembaev, QR Eńbek sińirgen qaıratkerleri Gúlzat Dáýirbaeva jáne Bolat Bókenov, oblystyq opera jáne balet teatrynyń jetekshi solısteri QR Mádenıet qaıratkeri Úralhan Seılbekova, Halyqaralyq baıqaýlardyń laýreattary Gúljan Raskalıeva, Marat Orazmetov, Erlan Jandarbaı, Mádihan Dúıseev, Jumabek Qańtarbaev, Qarakóz Ábdisháripova, Aıdos Imanjapparov, Qarlyǵa Berdııar kópshilik aldynda óz ónerlerin pash etti.
Sonymen qatar bas dırıjeri retinde Qazaqstannyń Eńbek sińirgen qaıratkeri, Abaı atyndaǵy Qazaq memlekettik akademııalyq opera jáne balet teatrynyń dırektory jáne kórkemdik jetekshisi - Asqar Bóribaev shaqyrylyp, Qaraqalpaqstannyń Halyq ártisi, Ózbekstandaǵy Alısher Navoı atyndaǵy memlekettik akademııalyq opera jáne balet teatrynyń dırıjeri Aıda Abdýllaeva jáne Ońtústik Qazaqstan oblystyq opera jáne balet teatrynyń bas dırıjeri Qýanysh Ismaılovtar da qatysty.
