Túrkistanda túrkitildes elderdiń kreatıvti ındýstrııasy qaýymdastyǵy quryldy

TÚRKІSTAN. QazAqparat - Memleket basshysy Qasym- Jomart Toqaev Túrkitildes memleketterdiń yntymaqtastyq keńesiniń 31 naýryzdaǵy beıresmı sammıtinde Túrkistan qalasy mádenıettiń, ekonomıkanyń dińgegine aınalýy kerektigin bolatyn. Osyǵan oraı, Túrkistan qalasynda kreatıvti ındýstrııa qaýymdastyǵy quryldy, dep habarlaıdy QazAqparat óńir basshysynyń baspasóz qyzmetine silteme jasap.

Uıymnyń maqsaty – túrki halyqtaryna ortaq bıznes alań qalyptastyrý, joǵary zııatkerlik jáne ınnovatsııalyq salalardy qoldaý, jastar arasynda shyǵarmashylyq qýatty oıatý.

Túrkistan oblysy ákiminiń orynbasary Meıirjan Myrzalıevtiń brıfıngte túrki áleminiń rýhanı astanasy mártebesine ıe bolý, sondaı-aq tarıhı qundylyǵyn eskere otyryp, qala biregeı kreatıvti klasterdi damytýda joǵary áleýetke ıe. Bul Túrkistandy jahandyq ınnovatsııalyq mádenı ortalyqqa aınaldyrýǵa múmkindik beretindigin aıtty.

«Osy maqsatta biz túrki halyqtaryna ortaq Kreatıvti ındýstrııa qaýymdastyǵyn quryp otyrmyz. Atalǵan salany damytý arqyly alpaýyt elder ekonomıkasyn ilgeriletip otyr. Bizdiń oıymyzsha, kreatıvti ekonomıkany damytý - búkil óńirdiń básekege qabilettiligin arttyrýǵa jasalatyn mańyzdy qadam»,- dedi Meıirjan Iıabaıuly.

Sondaı-aq, brıfıngke onlaın formatta qatysqan «FUTURK» Túrki tildes elderiniń kreatıvti ındýstrııa qaýymdastyǵynyń tóraıymy Elmıra Sársenalıeva Túrkistan qalasyndaǵy kreatıvti ındýstrııa qaýymdastyǵynyń jumysymen tanystyrdy.

«Memleket basshysy aıtqanyndaı, Túrkistan – tek mádenıettiń ǵana emes, ekonomıkanyń da ózegine aınalýy tıis. Osy maqsatta qaýymdastyq qurylyp otyr. Atalǵan alańda aldaǵy ýaqytta túrki halyqtarynyń kásipkerleri tájirıbe almasady. Bul – túrki tildes elderdiń talantty jastaryna qoldaý kórsetetin uıym bolmaq. Qaýymdastyqtyń mıssııasy – túrki halyqtaryna ortaq mádenı, týrıstik, aqparattyq orta qalyptastyrý. Bastysy, shaǵyn jáne orta kásipkerlikti qoldaý», - dedi Elmıra Álimjanqyzy.

Brıfıngke qatysqan Túrkistan oblysy kásipkerler palatasy dırektory Tımýr Naqypbekov jastardy qoldaýǵa arnalǵan jobalarmen tanystyrdy.

«Oblysymyzda kreatıvti jastardy, jobalardy qoldaý boıynsha oblys ákimdigimen birlese birneshe jobalar júzege asyryp jatyrmyz. Máselen, shaǵyn bıznesti qoldaýǵa baǵyttalǵan «Kásipkerlik qyrandary» jobasy bar. Elimizde alǵash ret bastaý alǵan joba óńirimizdiń iri, orta kásipkerleriniń ınvestıtsııalaryn jáne mıkrobıznesti, kreatıvti jastarymyzdy, startaperlerdi, «Bastaý bıznes» túlekterin naqty qoldaýǵa baǵyttalǵan. Kreatıvti jas kásipkerlerimiz ınvestıtsııa jáne mentorlar úshin kúreste ózderiniń bıznes-ıdeıalaryn tanystyryp, nátıjesinde 8 joba tańdalǵan bolatyn. Osylaısha, kretıvti jobalardy qoldap, damytý - olardyń shyǵarmashylyq qýatyn oıatýǵa múmkindik beretin óńirimizdiń básekege qabilettiligin arttyrýǵa jasalǵan mańyzdy qadam dep esepteımin», - dedi Tımýr Arsenuly.