Túrkistanda «Túrkistan - adaldyq alańy» jobalyq keńsesiniń tanystyrylymy ótti
TÚRKІSTAN. QazAqparat - Búgin Túrkistan oblysynda «Túrkistan - adaldyq alańy» atty jobalyq keńsesiniń tanystyrylymy ótti. Atalmysh jıynǵa oblys ákimi Janseıit Túımebaev pen ortalyq organdardyń aýmaqtyq departament basshylary men oblystyq basqarma basshylary qatysty, dep habarlaıdy QazAqparat tilshisi.
Sharany QR Memlekettik qyzmet isteri jáne sybaılas jemqorlyqqa qarsy is-qımyl agenttiginiń óńirlik departamenti uıymdastyrdy. Basqosýǵa sondaı-aq oblystyq arnaıy monıtorıngtik top tóraǵasy men keńselik joba qyzmetshileri qatysty. Jobanyń tanystyrylymy barysynda onyń maqsatyna toqtaldy. Aıtýlarynsha, onda Túrkistan oblysynda qoǵamnyń memlekettik bılik ınstıtýttaryna senimin arttyrý men jemqorlyq deńgeıin tómendetý, sonymen qatar qoǵam arasynda sybaılas jemqorlyqty qabyldamaý mádenıetin qalyptastyrý kózdelgen. Sharada osy joba jóninde QR Memlekettik qyzmet isteri jáne sybaılas jemqorlyqqa qarsy is-qımyl agenttiginiń Túrkistan oblysy boıynsha Departamentiniń basshysy Ǵalym Tursynbaev pen oblys ákiminiń orynbasy Málik Otarbaev, oblys ákimi apparatynyń bas ınspektory Erlan Mustafa baıandama jasady.
«Jobany júzege asyrý barysynda kelesi salalardy qamtý kózdelip otyr. Máselen, turmystyq jemqorlyqty joıý jáne azamattarǵa qolaıly jaǵdaı jasaý, qoǵamdyq baqylaýdy iske asyrý, sybaılas jemqorlyqqa qarsy mádenıetti qalyptastyrý. Atalǵan salalar boıynsha «bilim», «densaýlyq saqtaý», «halyqty áleýmettik qoldaý», «sáýlet, qala qurylysy jáne jer qatynastary», «memlekettik kirister organdary», «sot jáne quqyq qorǵaý organdary», «birinshi basshylardyń derbes jaýapkershiligi» tárizdi baǵyttar qamtylady. Sonymen qatar, joba barysynda taldaý nemese jetildirý obektisi bolatyn memlekettik mekemelerge jáne de, qoǵam ókilderine sybaılas jemqorlyqqa qarsy mádenıetti qalyptastyrý maqsatynda aqparattyq, zerdelik jumystar júrgizý kózdelip otyr», - dedi Ǵalym Tursynbaev. 
Jıynda budan ózge, aldaǵy ýaqytta atqarylatyn qyzmetterdiń jumys barysy talqylandy. Oblys basshysy Janseıit Túımebaev barlyq basqarmalar memlekettik qyzmetti kórsetýde azamattarǵa qolaıly jaǵdaı jasaý kerektigin tapsyrdy. Sonymen qosa, ashyqtyq pen memlekettik qyzmetkerlerdiń ádebin kóterý kerektigin atap ótti.
Aıta keteıik, atalǵan jobany bıylǵy jyldyń 31 jeltoqsanyna deıin júzege asyrý kózdelýde. Óz kezeginde, jobalyq keńseniń jumys atqarý merzimi Agenttik tóraǵasy men oblys ákiminiń birlesken sheshimine sáıkes uzartylýy múmkin.
