Túrkistanda túrki elderiniń fotosýretshileri kezdesti
Túrkistan qalasyndaǵy tarıhı-mádenı etnografııalyq ortalyǵynda ótken basqosýǵa Túrkııa, Soltústik Kıpr, Tatarstan, Bashqurtstan, Ózbekstan, Qyrǵyzstan elderi men Astana, Almaty qalalarynyń, Ońtústik Qazaqstan oblysynyń fotosýretshileri qatysty, dep habarlaıdy QazAqparat HAA tilshisi. 
Kezesýge sondaı-aq QR Memlekettik syılyǵynyń ıegerleri jáne kásibı halyqaralyq dárejedegi sýretshiler arnaıy shaqyryldy. Fotosýretshiler 4 shyǵarmashylyq topqa bólinip, oblystyń barlyq aýdan, qalalarynyń tarıhı-mádenı eskertkish oryndaryn aralap shyqty. Baı muraly tabıǵatqa ıe óńirdiń boıamasyz sulýlyǵyn tamashalap, tanysa aldy. Shyǵarmashylyq sátti kadrlaryn daıarlaýǵa qulshynǵan toptyń birinshi baǵyty Túrkistan, Kentaý, Otyrar, Qarataý qoryǵy aımaqtarynda ótse, ekinshi top Saryaǵash, Qazyǵurt, Jetisaı aýdandary men qalalarynda boldy. Al, úshinshi top Sozaq, Báıdibek aýdandaryna saparlady. Tórtinshi baǵyt Túlkibas, Tóle bı, Saıram aýdandarynda jalǵasty. Sońynan kásibı mamandar túsirgen týyndylar arnaıy kórmege qoıyldy.
Oblystyq mádenıet basqarmasynyń qoldaýymen, oblystyq mádenıet jáne halyq shyǵarmashylyǵy ortalyǵy, beıneleý óneri mýzeıiniń uıymdastyrýymen ótkizilgen bul shara táýelsiz elimizdiń salt-dástúrin, ádet-ǵurpyn, qasıetti mádenı sáýlettik eskertkishterdi nasıhattaýǵa baǵyttaldy. Qonaqtardy ońtústik óńiriniń tarıhı oryndary men ásem tabıǵatymen tanystyryp qana qoımaı, túrki elderiniń talantty fotosýretshileriniń ózara tájirıbe almasýyna jaǵdaı jasaldy. 
