Túrkistanda túrki álemi qolóner sheberleriniń festıvali ótti
«Túrkistan - túrki áleminiń mádenı astanasy» jyly aıasynda uıymdastyrylǵan sharada Túrkistan qalasynyń ákimi Álipbek Óserbaev quttyqtaý sóz sóılep, kıeli shahardyń bıyl sharyqtaǵan jyly bolǵanyn aıtyp ótti. Ákimniń aıtýynsha, aǵymdaǵy jyly jetpisten astam jobalar iske assa, onyń qyryqqa jýyǵy halyqaralyq deńgeıdegi basqosýlar bolǵan. Sondaı-aq, shahar basshysy shyǵarmashylyq ońaılyqpen kelmeıtin shabyt ekenin jáne bul, ásirese, qolóner salasynda asqan qaısarlyqty talap etetinin de nazardan tys qaldyrmady. Jıynda TÚRKSOI-dyń qazaqstandyq ókili Asqar Turǵanbaev ta sharanyń mańyzdylyǵyna toqtalyp, kórmeniń aldaǵy kezde de uıymdastyrylatynyn tilge tıek etti.
«Qolóner - bul ólmes óner. Atadan balaǵa mıras bolyp kele jatqan bekzat ónerimizdi joǵaltyp almaý bizdiń paryzymyz. Bul ónerdi keıingi jastarǵa úıretý qajet. Sondyqtan da bul festıvaldiń mańyzy erekshe. Ózge baýyrlas elder qolónershilerimen tájirıbe almasýy da búgingi arnaıy ótken kórmeden kórinis tapty. Túrkistan bir jyldyq qala emes, máńgilik rýhanı astanamyz bolyp qala bermek»,- dedi Asqar Turǵanbaev. Sonymen birge ol qolóner salasyndaǵy bul festıval TÚRKSOI aıasynda alǵash qosylǵanyn jáne aldaǵy mádenı astanalarda da óz jalǵasyn tabatyndyǵyn málim etti.
Shara sońynda qonaqtar qolóner mektebiniń sheberhanasynmen tanysyp, etnografııalyq mýzeıde bas qosty. Ózara pikir almasty.
