Túrkistanda týrızmdi damytýǵa úles qosqan úzdikter marapattaldy
TÚRKІSTAN. QazAqparat - Búgin Túrkistan oblysynda týrızm salasynyń úzdikterin marapattaý rásimi ótti.
Oblys ákiminiń orynbasary Erbol Tasjúrekov atalǵan salanyń óńirde jyldan jylǵa qarqyndy túrde damyp kele jatqanyn aıtyp, Túrkistandaǵy týrızmdi damytýǵa qyzmet etip júrgen 18 jeńimpaz azamatty on atalym boıynsha marapattady, dep habarlaıdy QazAqparat tilshisi.
Atap aıtqanda, «Týrıstik destınatsııany damytýǵa qosqan úlesi úshin» atalymyn Túlkibas aýdanynyń ákimdigi alsa, «Týrızm salasynyń damýyna qosqan úlesi úshin» nomınatsııasy Keńesbaı Ismaılov pen Elena Kerher, Ǵanı Nazarbekov pen Roza Shúkenovalar ıelendi. Al «Tarıhı-mádenı týrızmdi damytýǵa qosqan úlesi úshin» marapatyn «Áziret Sultan», «Otyrar», «Ordabasy» qoryq-murajaılarynyń ujymy enshilese, «Ekologııalyq týrızmdi damytýǵa qosqan úlesi úshin» atalymyn «Aqsý-Jabaǵyly» men «Qarataý» qoryqtary, «Saıram-Ógem» ulttyq jáne «Syrdarııa-Túrkistan» óńirlik parkteri ıelendi.
Sondaı-aq, merekelik basqosýda «Úzdik týrıstik uıym» - «Jańa talap grýp» JShS-ne, «Úzdik qonaq úı» - «Hanaka», «Úzdik sanatorly-kýrorttyq mekeme» - «Araı de Lıýks» shıpajaıyna, «Úzdik demalys aımaǵy» - «Almataý» demalys aımaǵyna, «Úzdik meıramhana» atalymy «Sky» meıramhanasyna jáne «Úzdik gıd-ekskýrsovod» ataǵy Ismaıl Omaralıevke tabystaldy.
Aıta keteıik, bıyl tuńǵysh ret ótkizilip otyrǵan sharany endigi kezekte jyl saıyn dástúrli merekege aınaldyrý josparlanyp otyr. Bul jumystar, óz kezeginde óńirde týrızmdi damytýǵa septigin tıgizip, qyzmet kórsetý sapasyn jaqsartpaq. Sapaly týrıstik ónim qalyptastyrýǵa oń áser etip, oblystyń týrıstik ındýstrııasynyń básekege qabilettiligin arttyrady dep kútilýde.
