Túrkistanda týrıstik polıtseıler 4 tilde erkin sóıleıdi
TÚRKІSTAN. QazAqparat - Túrkistan oblysynda polıtsııa departamenti kóshi-qon polıtsııasy basqarmasynyń janynan jańadan týrıstik polıtsııa quryldy. Tártip saqshylary kıeli shaharda shetel azamattarynyń qaýipsizdigi men jaılylyǵyn qamtamasyz etip, olardy tolǵandyrǵan kez kelgen suraq boıynsha aqyl-keńes beredi. Keleńsiz jaǵdaılar oryn alsa kómek kórsetedi, dep habarlaıdy QazAqparat tilshisi.
Oblystyq PD málimetinshe, bul shara QR Premer-Mınıstri Asqar Mamınniń tapsyrmasyna jáne QR týrıstik salasyn damytýdyń 2019-2025 jyldarǵa arnalǵan memlekettik baǵdarlamasyn iske asyrý jónindegi jol kartasyna saı júzege asyrylǵan. Jańa bólimniń ashylýyna oblystyq polıtsııa departamenti bastyǵynyń orynbasary A.Seıdýalıev arnaıy kelip, jańa mekemeniń jaqsy nátıje kórsetetinine senim bildirdi.
«Búgingi tańda Túrkistan oblysy polıtsııa departamentiniń týrıstik bólimshesi 10 qyzmetkerden turady. Onyń beseýi - Q.A.ıAsaýı kesenesinde bolsa, qalǵan beseýi - Otyrar aýdany polıtsııa bólimine, ıaǵnı Arystan bab mavzoleıine berildi. Ár nysanda modýldik túrdegi statsıonarlyq beketter ornalastyrylyp, jumys rejımi beınetirkegishtermen, planshettermen, ratsııalarmen jabdyqtalǵan jáne «Tourist Polise» jazýy bar formamen qamtamasyz etilgen»,- dedi A.Seıdýalıev.
Túrkistandyq týrıstik polıtsııa qyzmetkerleri ózderiniń kásibı jáne qyzmettik qasıetterimen qatar, týrıstermen qarym-qatynas jasaý úshin birneshe tildi meńgergen. Tarıhty bilip, týrısterdiń týyndaǵan máselelerin sheshý úshin ózge qurylymdarmen ózara is-qımyldy qamtamasyz ete otyryp, qyzmet jasaıdy.
Týrıstik polıtseıler sondaı-aq, shaǵyn kóliktermen jáne kerekti qural-jabdyqtarmen qamtylǵan. Polıtseıler qazaq, aǵylshyn, túrik jáne orys tilderin jetik meńgergen. Qoja Ahmet ıAsaýı kesenesiniń jáne Túrkistan qalasynyń tarıhy týraly jaqsy biledi. Olardy sondaı-aq, aldaǵy ýaqytta basqa da shet tilderin úıretetin kýstarǵa jiberý josparlanyp otyr.
