Túrkistanda «Turan tuǵyry» syılyǵynyń ıegerleri marapattaldy
TÚRKІSTAN. QazAqparat - Túrkistan oblysy boıynsha ulttyq sport túrlerinen bıyl alǵash ret «Turan tuǵyry» syılyǵynyń ıegerleri anyqtaldy. Saltanatty jıynda jyl boıy úzdik nátıje kórsetip, jeńiske jetken azamattarǵa qurmet kórsetildi, dep habarlaıdy QazAqparat tilshisi.
Atalǵan syılyqqa oblystyq ulttyq sport túrleri mektebiniń 13 úzdik sportshysy laıyqty dep tanyldy. 10 sport túri boıynsha úzdikter anyqtalyp, «Turan tuǵyry» belgisi tabystaldy. Sonymen birge kókpar sporty boıynsha 10 úzdikke qurmet kórsetildi.
Atap aıtsaq, «Úzdik sáıgúlik», «Úzdik shabandoz», «Úzdik atbegi», «Úzdik tóreshi», «Úzdik kommentator», «Úzdik aýdan», «Úzdik kókpar federatsııasy» jáne ózge de úzdik atanǵan órenderge arnaıy syılyqtar buıyrdy.
Sondaı-aq, 200-ge jýyq ulttyq sport túrleriniń janashyrlary arnaıy alǵys hattarmen marapattaldy. Aýdaryspaqtan «Jyldyń úzdik sportshysy» atalymyn Syrym Іzbasarov ıemdense, konkýr sportynan túrkistandyq Shyńǵys Malıkajdar úzdik dep tanyldy. Jamby atýdan Aıtbek Sarybaı úzdik bolsa, Erbulan Bekbosynov úzdik bapker atandy. Teńge ilýden talantty balýan Rahat Qambarov «Jyldyń úzdigi» atansa, onyń bapkeri Nurjan Ábilqasymov «Úzdik jattyqtyrýshy» atalymy boıynsha marapattaldy. Talaı dodalarda jeńiske jetken daryndy sańlaq Erkinbek Bólen «Úzdik balýan» atanyp, jerlesterin qýantty. Іri halyqaralyq dodalarda altyn medal alǵan aýdaryspaq sheberi túrkistandyq Ermek Quralbaı óńir sportshylarynyń jeńisi úshin bapkerlerdiń eńbegi zor ekenin jetkizdi.
Esterińizge sala keteıik, Aqtaýda ótken «Aq bıdaı» aýyl oıyndarynda da Túrkistan oblysynyń saıypqyrandary ulttyq sport túrlerinen jalpy esepte top jaryp, jeńis tuǵyrynyń eń bıik satysynan kóringen bolatyn. 2021 jyldy jetistikterimen túıindegen Túrkistan oblysynyń sportshylary bul dástúrdi jalǵastyra bermek.
