Túrkistanda «Týǵan jer – altyn besigim» atty sýretshiler baıqaýy ótti
TÚRKІSTAN. QazAqparat – Túrkistan qalasynda «Týǵan jer – altyn besigim» atty sýretshiler baıqaýy ótti. «Arbat» alańynda mádenıet úıi qyzmetkerleriniń uıymdastyrýymen ótken baıqaýǵa 16-25 jas aralyǵyndaǵy úmitkerler qatysty, dep habarlaıdy QazAqparat tilshisi.
«Túrkistan – qaýipsiz qala» jáne Elbasynyń «Bolashaqqa baǵdar: rýhanı jańǵyrý» maqalasy aıasynda júzege asqan shara Otanǵa degen súıispenshilikti arttyrýǵa, jastardy ulttyq rýhta tárbıeleý men olarǵa qoldaý kórsetý maqsatynda uıymdastyryldy. Baıqaýdyń ashylý saltanatynda sóz sóılegen qala ákiminiń orynbasary Murat Bazarqulov sharanyń mańyzdylyǵyna toqtalyp ótti.
«Іshki jan dúnıedegi qýanysh pen ókinish, mándi de maǵynaly sátterdi qylqalam kúshimen qaǵaz betine jazý men ony kópshilikke oǵyndyra bilý – tamasha qasıet. Ár kartınanyń ózindik alar orny, tarıhı máni, keler urpaqtyń qajetine jaratarlyq qundylyǵy bar desek, artyq aıtqandyǵymyz emes. Al, kez kelgen eldiń ataq-dańqyn shyǵaratyn – sol elde týyp ósken talantty tulǵalary men daryndy jastary ekeni belgili. Biz olarǵa osy kúnnen bastap qoldaý kórsetetin bolsaq, bolashaqta álemge tanylatyn sýretshiler atanaryna senim mol», – dedi qala ákiminiń orynbasary.
Baıqaýda jas sýretshiler Túrkistan qalasynyń kez-kelgen kórikti jerleri men mádenı oryndaryn beıneledi. Al, ádil qazylar júldegerlerdi anyqtaý barysynda olardyń oı ushqyrlyǵyna, ıdeıalyq mazmunyna, kompozıtsııalyq sheshimine, sheberligine basa mán berdi. Nátıjesinde Q.A.ıAsaýı atyndaǵy HQTÝ-diń óner fakýltetiniń 4-kýrs stýdenti Sh.Tajımetova bas júldege ıe bolyp, ózge qatysýshylarǵa da alǵys hattar men syı-sııapattar tabystaldy.
