Túrkistanda tigilgen zamanýı shapandardyń sanaýly ǵana danasy satylymǵa shyǵady
Túrkistanda týrızm salasyndaǵy ınvestıtsııalyq jobalardyń tanystyrylymy ótti. Іs-sharada týrızm jáne qonaqjaılylyq salasynyń sarapshylary, jergilikti memlekettik organdardyń ókilderi men kásipkerler Túrkistan oblysyndaǵy bızneske arnalǵan múmkindikter týraly aıtty. Al uıymdastyrýshylar prezentatsııalardy daıyndaý kezinde týrıstik baǵyttardy anyqtaý, jer ýchaskeleri men ınfraqurylymnyń bolýy, sondaı-aq usynylatyn baǵyttardyń marketıngtik strategııasyn ázirleý boıynsha birqatar taldaý jumystaryn júrgizdi.
Prezentatsııada Túrkistan aınalasyndaǵy tartymdy 5 ósý núktesi, shaǵyn jáne orta bızneske tıimdi ınvestıtsııalyq jobalar, qyzmet kórsetý jáne bólshek saýda salasynda qala úshin tıimdi franshızalar tanystyryldy.
Máselen, Almatylyq «Baiqazaq» fırmasy zamanaýı ári qazaqı shapan óndirisine ınvestıtsııa salýdy josparlap kelipti.
«Otandyq ónim qazaqy ári zamanaýı stılde tigiledi. Bir adam satyp alyp kıse, ekinshi adamnan kezdestire almaıdy. Sebebi, bizdiń shapandarymyzdyń bir túrinen tek 4 dana ǵana shyǵaramyz. Mindetti túrde oıý-órnekpen áspetteımiz. Qazir Almatyda tigip, satylymǵa shyǵarýdamyz. Negizgi tutynýshylarymyz - stýdentter, jastar. Endi Túrkistannan ókildik ashsaq dep nıettenip keldik. Munda týrıster kóp keledi. Otandyq ónimdi álemge tanytsaq degen josparymyz bar» - deıdi «Baiqazaq» fırmasynyń ókili Merýert Jaqsybaeva.
Al, «VR Arena» kompanııasynyń ókilderi «vırtýaldi saıahat» jobasyn usyndy. Joba aıasynda arnaıy kózáınekti kıip, álemniń kóptegen eline saıahat jasaýǵa, túrli oıyndar ishine kirip oınaýǵa bolady. Qazirgi kezde Astana, Pavlodar, Semeıde ashylǵan joba 12 mln teńgeni quraıdy. Kompanııa ókilderi Túrkistanda jobany júzege asyrý úshin ınvestorlar izdestirýde.
Іs-sharada kásipkerler «Turkistan» arnaıy ekonomıkalyq aımaǵynyń áleýeti jáne nesıe beretin uıymdardyń múmkindikterimen de tanysty.
