Túrkistanda taýyq ósirý isi qolǵa alyndy
ShYMKENT. QazAqparat - Túrkistanda taýyq ósirý isi qolǵa alyndy. Qalaǵa qarasty Oranǵaı aýylyndaǵy sharýa qojalyǵy negizinen taýyq eti men jumyrtqa óndiredi. Ótken jyly ashylǵan qus sharýashylyǵy sońǵy úlgidegi tehnologııalarmen jabdyqtalǵan. Munda qazir 12 myń bas et baǵytyndaǵy jáne 22 myń bas jumyrtqa baǵytyndaǵy taýyq ósirilýde, dep habarlaıdy QazAqparat HAA tilshisi.
Jalpy seriktestikte bir jyl kóleminde 4,4 mln dana jumyrtqa óndirilip, bul kólem qala boıynsha óndiriletin jumyrtqanyń 30,4 paıyzyn qurady. Jobanyń ekinshi kezeńi 2017 jyldyń ekinshi jartyjyldyǵynda paıdalanýǵa beriledi. Jobanyń quny 312 mln teńgeni qurap, qosymsha 22 myń jumyrtqa baǵytyndaǵy taýyq ósirilip, jyl sońyna deıin 90 tonna taýyq eti jáne 10,8 mln. dana jumyrtqa óndirilmek. Sharýashylyqtyń jumysymen jiti tanysqan Ońtústik Qazaqstan oblysynyń ákimi Janseıit Túımebaev keleshekte ónim kólemin odan ári arttyryp, negizgi qýattylyqqa jetýdi júktedi.
«Túrkistan qalasynda atqarylyp jatqan jumystar az emes. Desek te, kásipkerlik nysandarynyń qataryn arttyryp, jumyssyzdyqty azaıtý máseleleri nazardan tys qalmaýy tıis. Aýdan basshylarynyń jumysy sonda ǵana nátıjeli bolady», - dedi Janseıit Qanseıituly.
Eger joba tolyq iske asyrylsa, fabrıka ónimderi Túrkistan qalasyna syrttan keletin taýyq etteriniń ornyn almastyrmaq.
