Túrkistanda táýelsizdik jyldaryndaǵy eldiń jetken jetistikteri talqylandy
«Táýelsiz Qazaqstan: Jasampazdyqqa toly jyldar. Túrkistan oblysynyń basty jetistikteri» taqyrybynda ótken jıynǵa oblys ákiminiń orynbasary Sáken Qalqamanov jáne óńirdegi tarıhshy, ǵalymdar, saıasattanýshylar men qoǵam qaıratkerleri qatysty.
«Bıylǵy jyl elimiz úshin eń eleýli oqıǵalardyń biri – Táýelsizdiktiń 30 jyldyq mereıtoıy. Keshegi ata-babalarymyzdyń tókken teri men qan maıdandarda aqqan qanynyń óteýi – búgingi Táýelsizdik. Qanshama qıly kezeńderdi basynan keship, urpaqqa beıbit kúndi syı etken babalarymyzdyń amanatyna adaldyq tanytý – bizdiń eń úlken boryshymyz. Qazaqstan Táýelsizdiginiń tarıhynda Elbasy Nursultan Nazarbaevtyń alar orny erekshe. Asa kóregendilikpen júrgizilgen memlekettik saıasattyń nátıjesinde biz tórtkúl dúnıemen terezesi teń, shekarasy aıqyn, erkin elge aınaldyq. Elbasy jarlyǵymen Túrkistan oblysynyń qaıta qurylyp, rýhanı shaharǵa oblys ortalyǵy mártebesi berilýi – Táýelsizdiktiń aıtarlyq bir jemisi. Jarlyqtyń jaryq kórgenine úsh jyldan asa ǵana ýaqyt ótse de, Túrkistan ajarly qalaǵa aınalyp kele jatyr. Qala kelbetine kórik qosatyn ǵımarattardyń alǵashqylary paıdalanýǵa berilip, óz jumysyn bastady. Endi bizdiń aldymyzda sol ǵımarattardy el ıgiligi jolynda paıdalanyp, artylǵan senimdi aqtaý mindeti tur»,- dedi Sáken Qalqamanov.
Tarıh ǵylymdarynyń doktory, professor Hazretáli Tursyn osy jyldar ishindegi óńirdegi kásipkerlik salasynyń damyp, jastarǵa jasalǵan qamqorlyqtyń artqany pen Túrkistandy túletýdegi Elbasynyń orny aıryqsha ekendigin atap ótti. Sonymen qatar, basqosýda eldegi etnosaralyq turaqtylyqtyń saqtalýy men ınvestıtsııalyq ósim, Túrkistan oblysyn damytýdaǵy Elbasynyń eńbegi jóninde oılar ortaǵa salyndy. Bul baǵyttaǵy usynys-pikirler tyńdaldy.