Túrkistanda «Táýelsizdik urpaǵy – jyl kóshbasshylary» atty oblystyq jastar forýmy ótti
QR Táýelsizdiginiń 30 jyldyq merekesine oraı Túrkistan oblystyq qoǵamdyq damý basqarmasynyń «Jastar resýrstyq ortalyǵy» uıymdastyrǵan forýmǵa óńir jastary qatysty. Forýmnyń negizgi maqsaty – jastardyń kóshbasshylyq qyryn ashyp, memleketti damytý men ult múddesi jolyndaǵy isterge jumyldyrý boldy. Jıynda oblystyq qoǵamdyq damý basqarmasy basshysynyń orynbasary Baqyt Ahymbetov quttyqtaý sóz sóılep, jastarǵa tabys tiledi. Táýelsizdiktiń qadirli qundylyq ekenine toqtalyp, jastardy otanshyl bolýǵa shaqyrdy. Basqosýda kreatıvti ındýstrııa salasyndaǵy kásipker Asqar Abýbakırov moderator bolyp, júrgizip otyrdy. Forýmda memlekettik jastar saıasatyn júzege asyrý máselesi keńinen sóz bolyp, onyń damýyna zor úles qosqan ári eldiń saıası jáne qoǵamdyq ómirine belsene aralasyp júrgen spıkerler oı bólisti. Atap aıtsaq, «Global coffee», «Salem coffee & tea» kofehanalar jelisiniń negizin qalaýshy Aıat Azımov, paralımpııalyq sportshy, voleıbolshy, Almaty qalalyq máslıhatynyń depýtaty Serik Esmatov óz salalary boıynsha ıdeıalaryn ortaǵa saldy. Pikirsaıysshy, QR pikirsaıys týrnırleriniń birneshe dúrkin jeńimpazy, 2014 – 2016 jyldardaǵy QR úzdik spıkeri Bekarystan Amanjolov, ońtústik aımaqtaǵy qazaq-túrik muz aıdyny qaýymdastyǵynyń negizin qalaýshy Dinmuhammed Zııatbekov, «Atameken» UKP bıznes-treneri, jeke kásipker Qanat Ábildábekov jáne «City hotel Shymkent» qonaq úıiniń dızaın úılestirýshisi Qaljan Shotaeva jastarǵa tájirıbeleri men jetistik syrlary týraly baıandady. Túrkistan jastary san qyrly taqyryp boıynsha maǵlumat alyp, spıkerlerge óz oılaryn bildirdi. Usynys-pikirlerin ashyq jetkizip, saýaldaryn qoıdy. Naqty jaýaptar alyp, Túrkistandy damytý jolynda eńbek etetinderin jetkizdi.
