Túrkistanda Táýelsizdik kúnine oraı saıabaq ashyldy
ASTANA. QazAqparat - Elimizdiń Táýelsizdiginiń 27 jyldyǵy qarsańynda Túrkistan qalasynda jańa saıabaq el ıgiligine berildi, dep habarlaıdy oblystyq ákimdiktiń baspasóz qyzmeti.
Qalanyń Kentaý baǵytynan kire berisinen 14 gektar jerge ornalasqan «Parasat» saıabaǵynyń qurylysy 2018 jyldyń tamyz aıynda bastalyp, jeltoqsan aıynda paıdalanýǵa berilip otyr. Demalys aımaǵynyń qurylys montaj jumystaryna 260 mln. 742,92 myń.teńge qarjy bólingen. Qurylysty «Túrkistan jaryq tazalyq» JShS mekemesi júrgizgen.
Ashylý saltanatyna qatysqan oblys ákimi Janseıit Túımebaev qala turǵyndaryn jańa demalys aımaǵynyń ashylýymen quttyqtady.
«Túrkistan - oblys ortalyǵy retinde kúnnen kúnge kórkeıip, abattanyp keledi. Aldaǵy ýaqytta jańa qala boı kóteretin bolady. Túrkistan - rýhanı ári mádenı, ekonomıkalyq jáne áleýmettik turǵydan damyǵan shaharǵa aınalmaq. Mine, búgin Táýelsizdik merekesi qarsańynda ashylyp otyrǵan saıabaq oblys ortalyǵy turǵyndarynyń súıikti demalys aımaqtarynyń birine aınalady dep oılaımyn. Egemendigimiz eńseli, táýelsizdigimiz tuǵyrly bolǵaı», - dedi Janseıit Qanseıituly.
Saıabaq abattandyrylyp, arhıtektýralyq qurylysy jaǵynan sońǵy úlgide jasaqtalǵan. Ondaǵy ornatylǵan jaryq baǵanalary men arkalar, smart oryndyqtar, sýburqaqtar men trenajerlik aspaptar, tennıs, fýtbol, basketbol alańshalary men velojoldar jáne kontsert alańy demalýshylarǵa qolaıly jaǵdaı týǵyzatyn bolady. Saıabaqty sýmen qamtamasyz etý júıesi tolyǵymen avtomattandyrylǵan.
