Túrkistanda Táýelsizdik kúni toılandy

Elimizdiń eń ulyq merekesine jıylǵan jurtshylyqty Túrkistan oblysynyń ákimi Janseıit Túımebaev quttyqtap, Táýelsizdik týraly tebirenisterin ortaǵa saldy, dep habarlaıdy QazAqparat tilshisi.

Aımaq basshysy Táýelsizdik kúni merekesin jańa oblys ortalyǵy - Túrkistan qalasynda tuńǵysh ret atalyp ótip jatqanyn tilge tıek etip, bul da bir tarıhı oqıǵa ekenin jetkizdi. Sondaı-aq, Elbasynyń qoldaýymen Túrkistannyń tynysy ashylyp, jańa maqsattar men mejeler aıqyndalyp kele jatóanyǵyna toqtaldy.

«Táýelsizdik - uly uǵym. Jumyr jer betinde azattyǵyn ańsap, bostandyqqa qol jetkize almaı júrgen ulttar kóp. Jyl, aı emes, mınýt saıyn qubylatyn almaǵaıyp zamanda Qazaqstanymyzben maqtanyp qana qoımaı, táýelsizdigimizdi tuǵyrly etý úshin barshamyz eńbek etýge tıistimiz. Búginde Elbasymyzdyń qoldaýymen Túrkistanymyz túrlenip, oblysymyzdyń áleýeti kóterilip keledi. Jyl basynan beri ónerkásip óniminiń kólemi 409,6 mlrd. teńgeni qurady. Aýyl sharýashylyǵynyń jalpy ónim kólemi 508,2 mlrd. teńgege jetse, shetelderge et 6,2 myń tonna et eksporttaǵan oblysymyz bul kórsetkish boıynsha respýblıkada 1-oryndy ıelendi. 11 aıda qurylys jumystarynyń kólemi 110 mlrd. teńgege, al, paıdalanýǵa berilgen turǵyn úıdiń jalpy alańy 374,8 myń sharshy metrdi qurady. Qazirdiń ózinde «Rıksos» qonaq úıi men iskerlik ortalyǵynyń qazyǵy qaǵyldy. Taıaýda Túrkistan qalasynda 30 iri nysannyń qurylysy bastalady. Barshańyzdy Táýelsizdik kúnimen quttyqtaı otyryp, otbasylaryńyzǵa amandyq, ıgi bastamalaryńyzǵa sáttilik tileımin», - dedi Janseıit Túımebaev.

Jıynda oblys ákimi eńbegimen daralanǵan 55 adamǵa túrli marapattardy saltanatty túrde tapsyrdy. Sonymen qatar merekelik keshte Túrkistan oblysynyń «Qazyna», «Tumar» bı ujymdary men oblystyq opera jáne balet teatrynyń ónerpazdary «Atameken» horeografııalyq kompozıtsııasyn usyndy. Jeztańdaı ánshiler «Aınaldym elim», «Qazaǵym», «Nur-Astana», «Qalam meniń - Túrkistan», «Otan», «Qazaqstanym» jáne ózge de patrıottyq ánderdi shyrqady.