Túrkistanda tarıhı eskertkishterdi qorǵaýǵa arnalǵan fotokórme ótti

TÚRKІSTAN. QazAqparat – Túrkistan qalasynda «Halyqaralyq eskertkishter men tarıhı oryndar kúnine» oraı óńirdiń sáýlet, arheologııa eskertkishteri men kıeli oryndary qamtylǵan kórme ótti. Sharanyń ótýine oblystyq tarıhı-mádenı murany qorǵaý, qalpyna keltirý jáne paıdalaný ortalyǵy uıytqy boldy, dep habarlaıdy QazAqparat tilshisi.

Atalǵan shara tarıhı-mádenı nysandardy nasıhattaı otyryp, eskertkishterdi qorǵaý jaıynda turǵyndarǵa aqparattandyrý-aǵartý jumystaryn júrgizýge oraı uıymdastyryldy. Arheologııalyq eskertkishtermen qosa kıeli oryndardyń fotosýretteri qoıylǵan kórme qala ákimdiginiń ǵımaraty aldyna jáne tsıtadel qaqpasyna baratyn aıaqjol alańqaıyna qoıyldy. Kórmeni tamashalaǵan qala turǵyndary men qonaqtary sýretterdi qyzyqtaı júrip, eskertkishterdi qorǵaý salasynda atqarylyp jatqan sharýalarmen tanysty. Aıta keteıik, Túrkistan oblysynda 1 nysan ıÝNESKO sheńberindegi halyqaralyq mańyzy bar eskertkishter sanatyna jatady. Al, 31 nysan respýblıkalyq mańyzy bar, 423 nysan jergilikti mańyzy bar eskertkish sanalady.

Tarıhı-mádenı eskertkishterdi búldirý, qasaqana joıý áreketine QR Ákimshilik quqyq buzýshylyq týraly kodeksiniń talaptaryna sáıkes 10 AEK-ten bastap, 250 AEK-ke deıin aıyppul salynady. Sonymen qatar, QR Qylmystyq kodeksiniń talaptaryna saı 3 jyldan 7 jylǵa deıin bas bostandyǵynan aıyrý jazasy qarastyrylǵan.