Túrkistanda taksı júrgizýshisi bankomattan aqsha alǵan áıeldi óltirip ketti
ShYMKENT. QazAqparat - Túrkistanda taksı júrgizýshisi jas kelinshekti óltirip, máıitin qamystardyń arasyna tastap ketken, dep habarlaıdy QazAqparat tilshisi.
Oblystyq ІІD baspasóz qyzmetiniń málimetinshe, 24 jastaǵy Áıgerim Tasbolatovany óltirgen kúdikti ustalyp, qamaýǵa alyndy.
Tergeý barysynda anyqtalǵany, marqumdy ata-anasy eki apta buryn Túrkistan qalasyna jibergen. Ol kıeli shaharda áke-sheshesiniń bankomat kartochkasynan 180 myń teńgesin sheship alǵan. Keıinnen iz-túzsiz joǵalyp ketken bolatyn. Keıin izdeý jarııalanǵan turǵynnyń óli denesi tabyldy.
Belgili bolǵandaı, Áıgerim bankomattan aqsha alǵan sátin jergilikti taksısterdiń biri baıqap qalypty. Sóıtip kólik júrgizýshisi jas kelinshekti kóligine aldap mingizip, qalanyń shetine aparyp qylqyndyrǵan. Keıin qomaqty aqshasy men uıaly telefonyn qoldy etipti. Urlanǵan zattardy satyp, bas paıdasyna jaratqan. Alaıda ol kóp uzamaı-aq osy satylǵan telefon arqyly tártip saqshylarynyń qolyna túsken. Sotqa deıingi tergeý amaldary kezinde jasaǵan qylmysyn moıyndap, máıitti ózi taýyp bergen.
Kúdikti kelinshektiń óli denesin Dostyq aýylynyń shetindegi qamystardyń arasyna tastap ketipti. Qazirgi tańda birneshe sot-medıtsınalyq saraptamalar taǵaıyndalyp, tergeý sharalary júrgizilýde. Іs tergelip jatyr.
