Túrkistanda Táken Álimqulov pen Asqar Súleımenovti eske alý keshi ótti
TÚRKІSTAN. QazAqparat - Túrkistanda qazaqtyń kórnekti jazýshysy, aqyn, ádebıet synshysy Táken Álimqulovtyń 100 jyldyǵy men jazýshy, dramatýrg Asqar Súleımenovtiń 80 jyldyǵyna oraı «Qarataýdyń tól perzentteri» atty eske alý keshi ótti. «Uly dalanyń dara danalary» kitap kórmesi uıymdastyryldy, dep habarlaıdy QazAqparat tilshisi.
Elbasy N.Á.Nazarbaevtyń «Bolashaqqa baǵdar: rýhanı jańǵyrý» maqalasy aıasynda uıymdastyrylǵan sharaǵa aqyn, Qazaqstan Jazýshylar odaǵy basqarmasy tóraǵasynyń orynbasary Baqyt Bedelhanuly men Qazaqstannyń Memlekettik jáne «Alash» Halyqaralyq ádebı syılyǵynyń laýreaty, aqyn, jazýshy Esenǵalı Ábdijapparuly qatysty. Sondaı-aq elimiz ben Sheshen Respýblıkasynyń zııaly qaýym ókilderi, stýdentter men buqaralyq aqparat quraldary shaqyryldy.
Keshke qatysqan oblys ákiminiń orynbasary Málik Otarbaev sóz sóılep, Táken Álimqulovtyń jubaıy Esimkúl Álimqulova men Asqar Súleımenovtiń uly Alısher Súleımenovke oblys basshysynyń syı-sııapatyn tabys etti.
«Qulagerdeı qalamgerlerdiń atyn ardaqtaý, qurmet tutyp qasterleý, bıikke kóterý, mura etip qaldyrǵan altyn qazynalaryn keleshek urpaqqa jetkizý, barshamyzdyń paryzymyz. Ádebı shoǵyrda orny bólek sóz sáıgúligi, qazaqtyń qara sóziniń zergeri atanǵan kórnekti jazýshy, aqyn Táken Álimqulovtyń týylǵanyna 100 jyl jáne de týmysy bólek tulǵa, ózgeshe daryn ıesi Asqar Súleımenovtiń 80 jyldyǵyna arnalǵan mereıli mereke Qazaqstan kóleminde atalyp ótýde. Elim dep eńsesin tiktegen, ultym dep uıqysy qashqan aıtýly tulǵalardyń tuǵyry qashan da bıik»,- dedi Málik Otarbaev.
Shara barysynda R.Seıtmetov atyndaǵy Túrkistan sazdy drama teatrynyń ártisteri «Qarataýdyń tól perzentteri» poetıkalyq kompozıtsııasyn oryndap, kesh sońy oblys ónerpazdarynyń kontserttik baǵdarlamasyna ulasty.
