Túrkistanda «Taǵzym», «Tazarý», «Balalar» kúnderi atalyp ótiledi

TÚRKІSTAN. QazAqparat - Túrkistandyqtar Naýryz meıramy qarsańynda apta boıy taǵylymdy sharalardy tamashalaıdy. Bul týraly Túrkistan óńirlik kommýnıkatsııalar qyzmetinde ótken brıfıngte oblystyq mádenıet jáne tilderdi damytý basqarmasy basshysynyń orynbasary Asylhan Temirhanuly aıtty, dep habarlaıdy QazAqparat tilshisi.

Asylhan Temirhanulynyń sózine qaraǵanda, Túrkistan tórinde bastaý alatyn merekelik is-sharalar 14 naýryzdan bastalady. Oblystaǵy etnos ókilderimen birlesken kontserttik baǵdarlamalar uıymdastyrylyp, ulttyq taǵamdar tartý etiledi. Óńirdegi kitaphanalarda «Meniń elim kúndeı nurly Qazaqstan», «Naýryz jyl basy» atty taqyryptarda kitap kórmeleri ótedi.

«15 naýryz «Taǵzym kúnine» oraı dúnıeden ótken azamattardyń rýhyna quran baǵyshtalyp, qurbandyq shalynady. Bul kúni merekeli, berekeli Naýryz toı», «Naýryz - jyl basy» atty mádenı is-sharalar atalyp ótiledi. Sondaı-aq, «Din ımandylyq uıytqysy» atty taqyryptarda kezdesý keshteri ótetin bolady» - dedi basqarma basshysynyń orynbasary.

Al, 16 naýryz «Tazarý kúni» aýdan qalalarda senbilik uıymdastyrylmaq. 17 naýryz «Kóktem shýaǵy kúnine» baılanysty sporttyq oıyndar kıeli Túrkistan qalasynda saǵat 10-00 den keshki 18-00 ge deıin jalǵasady. 18 naýryz «Kóktem órnekteri kúni» dep atalyp, qoǵamdyq kólikter men memlekettik mekemelerdi jáne kóshelerdi merekege saı bezendirý qolǵa alynady.

«19 naýryz «Balalar kúninde» tsırktik jáne teatrlandyrylǵan qoıylymdar, ulttyq sporttyq oıyndar uıymdastyrylady. Sonymen qatar, merekege oraı tátti toqashtar men balmuzdaq taratylady dep josparlanýda. 20 naýryz «Birlik kúni» aıasynda ardagerlerdi merekemen quttyqtap, dastarhan jaıylady»,- dedi Asylhan Temirhanuly.

Al, 21 naýryz «Naýryz» merekesi kúni oblys ákiminiń qatysýymen saǵat 10-00 de «Qosh keldiń, Áz Naýryz!» teatrlandyrylǵan merekelik is-sharasyn uıymdastyrý josparlanǵan. Sol kúni 19-00 de «Esimhan» alańynda gala kontsert qoıylmaq. 22 naýryz «Naýryz» merekesi juma kúni Túrkistan oblysynda merekelik is-sharalar, jalpyhalyqtyq serýender jáne kontserttik baǵdarlamalar men ulttyq sporttyq oıyndar uıymdastyrylady dep kútilýde.