Túrkistanda tabıǵı gazdy turǵyn úıge kirgizý baǵasy arzandady
ASTANA. QazAqparat - Qazirgi tańda Túrkistan qalasyn gazdandyrý jumystary úlken qarqynmen júrip jatyr. Tabıǵı gazdy turǵyn úıge kirgizý qunyn tómendetý jumystary retteldi, dep habarlaıdy oblystyq ákimdiktiń baspasóz qyzmeti.
Máselen, buǵan deıin tabıǵı gazdy jeke turǵyn úıge kirgizý baǵasy - 106 000 teńge bolyp bekitilse, qazir 85 000 teńgege deıin tómendegen.
Oblys ortalyǵy turǵyndarymen kezdesken «Nur Otan» partııasy Túrkistan oblystyq fılıaly tóraǵasynyń birinshi orynbasary Nurmahan Joldasov turǵyndar úshin jalpy somany bólip tóleýine jaǵdaı jasalǵanyn jetkizdi.
«Túrkistan qalasyn gazdandyrý isi búgingi kúnniń basty máselesiniń biri. Oblys ákimi, «Nur Otan» partııasy Túrkistan oblystyq fılıalynyń tóraǵasy Janseıit Túımebaevtyń bastamasymen bul baǵyttaǵy sharalardy júzege asyryp jatyrmyz. Kógildir otyndy úıge deıin kirgizý jumystaryn 80 myńǵa deıin tómendettik. Al, 6 myń teńge gaz óship qalǵanda turǵyndar gazǵa tunshyǵyp qalmas úshin, aýany tazartatyn quraldyń baǵasy. Onyń 1000 teńgesi gaz qubyryn júrgizýshi merdiger mekemeniń esebinen tólenip otyr. Jalpy, úıge deıin gaz kirgizýdiń jalpy somasy 85 myń teńge bolyp bekitildi. Sondaı-aq, turǵyndar 85 myń teńgeni úsh bólip tóleýge de múmkindigi bar. Birinshi kezeńde qujattamalar jasaý úshin 30 myń teńge tóleıdi. Qujattamalar tolyǵymen aıaqtalǵannan soń gaz qubyrynyń ishki qurylystary júrgiziletin tusta 30 myń teńge tóleıdi. Qurylys jumystar tolyǵymen támamdalyp, gazdy qosatyn kezde qalǵan 25 myń teńgesimen eseptesetin bolady», - dedi Nurmahan Mııatuly. 
Aıta keterligi, bıyl Túrkistan qalasynyń turǵyndarynyń 60 paıyzǵa jýyǵy tabıǵı gazben qamtylady. Al, 2020 jyly qala tolyǵymen tabıǵı gazben qamtylmaq. Qalany gazben qamtý 3 kezeńmen júzege asyrylýda. І-kezeńniń jumystary boıynsha 10 518 abonentke gaz qubyry júrgizilip, 43 myńǵa jýyq qala turǵynyna tabıǵı gaz berildi. Búginde ІІ-ІІІ kezeńniń quny 20 mlrd. 271 mln. teńgeni quraıtyn 11 joba ázirlenip, qurylys jumystary bastalǵan.
