Túrkistanda Sultanbek Qojanovtyń qyshqa qashalyp jazylǵan qoltańbasy bar
Túrkistan oblysynda Alashtyń arysy Sultanbek Qojanov jaıynda birshama qundy jádigerler bar. Máselen, Sozaq aýdanyndaǵy Sultanbek Qojanov atyndaǵy murajaıda ІÚ-shi Ózbek keńes sezine qatysý aldynda óz qolymen toltyrǵan aneketasy saqtaýly tur. Odan bólek, ózi qol qoıǵan hattamalar men ózge de qujattardyń kóshirmelerimen tanysýǵa bolady. Qyzmet babynda túsken sırek sýretterdi de mýzeı qorynan kezdestire alasyz.
Al, Túrkistan qalasyndaǵy Sattar Erýbaev mýzeıindegi ǵımaratta qyshqa qashalyp jazylǵan «H. Sý...n» degen jazý saqtalǵan. Jergilikti turǵyndar bul 1910 jyly atalǵan mektepte bilim alǵan Sultanbek Qojanovtyń qoltańbasy dep biledi.
«Adamnyń qoltańbasyn zertteıtin krıptografııa deıtin ǵylym bar. Munyń anyq-qanyǵyn rásimdep berýdi sol mamandardyń enshisine qaldyraıyq ta, kishkentaı bolsa da, osy bir jádigerimizdi Sultanbektiń kózindeı kórip, keler urpaqqa amanat etip aıtyp júreıik», - deıdi ǵalym Bekjigit Serdáli.
Bul qoltańbany QR Mádenıet qaıratkeri, Túrkistan qalasynyń Qurmetti azamaty Nurmahan Nazarov taýypty. Nysannyń syrtyna tazartý jumystary júrip jatqan sátte kórip qalǵan. Sodan BAQ arqyly maqalalalar jazyp, qundy dúnıemen kópshilikti tanystyrǵan.
Jalpy bul ǵımarat 1904 jyldary kúıdirilgen kirpishten salynǵan. Sodan 1989 jylǵa deıin 3 synyptyq orys túzem mektebi retinde jumys istegen. Munda qoǵam qaıratkerleri Sultanbek Qojanov pen Sattar Erýbaev bilim alǵan. Keıinnen Sattar Erýbaev memorıaldyq mýzeıi bolyp ashyldy. Al, 1995 jyly ádebı-mádenı murajaı mártebesine ıe boldy. Munda Sattar Erýbaev pen qatar jergilikti qalamgerlerdiń ádebı muralary jınaqtalǵan.
