Túrkistanda sýbsıdııa alýǵa kómektesemin dep 30 turǵyndy aldaǵan áıel ustaldy
TÚRKІSTAN. QazAqparat - Túrkistanda sýbsıdııa alýǵa kómektesemin dep 30 turǵyndy aldap ketken áıel ustaldy. Kúdiktiniń jábirlenýshilerge bir mıllıon teńgeden asa shyǵyn keltirgeni anyqtalyp otyr, dep habarlaıdy QazAqparat tilshisi.
Túrkistan oblystyq PD baspasóz qyzmetiniń málimetinshe, jergilikti turǵyndar qaladaǵy tártip saqshylaryna aryzdanyp kelgen. Aıtýlarynsha, belgisiz bir áıel olarǵa «sýbsıdııa alyp beremin» dep 40 myń teńgeden jınaǵan. Sodan keıin qarasyn kórsetpegen. Jedel izdestirý sharalarynyń nátıjesinde jurtty aldap soqqan áıel qolǵa tústi.
Tergeý barysynda onyń 30 adamnan memlekettik baǵdarlama boıynsha aqsha alýǵa kómektesemin degen ýádemen 1 mıllıon teńgeden asa aqsha alǵany dáleldendi.
Qazirgi tańda osy oqıǵa boıynsha Qylmystyq kodekstiń 190-shy «Alaıaqtyq» babymen is qozǵalyp, sotqa deıingi tergeý amaldary júrgizilýde. Tártip saqshylary kúdiktiniń osyǵan uqsas ózge de qylmystarǵa qatystylyǵyn tekserýde.
