Túrkistanda sýarmaly jerlerdi paıdalaný máseleleri talqylandy
TÚRKІSTAN. QazAqparat - Túrkistanda «Sýarmaly jerlerdi tıimdi paıdalanýdyń ózekti máseleleri» atty otyrys ótti, dep habarlaıdy QazAqparat oblys ákiminiń baspasóz qyzmetine silteme jasap.
Májilistiń Agrarlyq máseleler komıtetiniń «Sýarmaly jerlerdi tıimdi paıdalanýdyń ózekti máseleleri» atty kóshpeli otyrysy Túrkistanda ótti. Otyrysqa QR Parlament Májilisi Agrarlyq máseleler komıtetiniń depýtattary, QR Aýyl sharýashylyǵy mınıstrliginiń ókilderi, Jambyl, Qyzylorda, Almaty oblysy ákimderiniń orynbasarlary men aýyl sharýashylyǵy salasynyń basshylary, aýdan, qala ákimderiniń orynbasarlary men aýyl sharýashylyǵy taýar óndirýshileri qatysty.
Sharada Kóksaraı sý rettegishi men Bógen sý qoımasynyń jumysymen jáne sharýa qojalyqtarynyń sýarmaly jerdi tıimdi paıdalaný aıasynda ósirip otyrǵan baý-baqshalary tanystyryldy. Sondaı-aq, sýarmaly jerdi ulǵaıtý jobalary men jerdi tıimdi paıdalanýdyń ózekti máseleleri talqylandy.
Kóshpeli otyrys 2 kúnge josparlanǵan. Birinshi kúni sý nysandarynyń jumysymen jáne sýarmaly jerdi tıimdi paıdalanyp otyrǵan sharýa qojalyqtarymen tanyssa, al ekinshi kúni 100-den asa aýyl sharýashylyǵy qyzmetkerleri men taýar óndirýshileri qatysýmen otyrys ótti.
Jıynda Túrkistan aımaǵyndaǵy 63,3 myń ga sýarmaly jerdi sýmen qamtamasyz etetin jalǵyz sý nysany «Bógen» sý qoımasy arqyly jetkiziletin, uzyndyǵy 145 shaqyrym quraıtyn Túrkistan magıstraldy kanaldyń jaǵdaıy qaraldy.
Sonymen qatar, Túrkistan magıstraldy kanalyn tolyǵymen aǵyn sýmen qamtamasyz etý úshin, Syrdarııa ózeninen sý ótkizý qabileti sekýyndyna 20 tekshe metr, 3 kótermeli sorǵy stansasy, uzyndyǵy 53,2 shaqyrym (20,7 shaqyrymy - jer aryq, 17 shaqyrymy - qubyr, 15,5 shaqyrym betondy) bolatyn mashınalyq kanal salý nátıjesinde, qosymsha 80 mln tekshemetr aǵyn sý jetkiziledi.
Budan basqa, syıymdylyǵy 16 mln tekshe metr quraıtyn «Keńsaı-Qosqorǵan 2» sý qoımasyn salý usynyldy. Sonymen qosa, Kentaý qalasynyń aımaǵynda uzyndyǵy 54,8 shaqyrym bolatyn Túrkistan magıstraldy kanaldyń bóligin betonmen qaptaý jumystaryn júrgizý arqyly 60 mln tekshe metr fıltratsııalyq aǵyn sýdy únemdeý kútilýde.
Aıta keteıik, Túrkistan qalasyn sýmen qamtamasyz etýde jer asty sýynyń mańyzy zor. Qazirgi tańda, jaramsyz bolyp qalǵan 145 uńǵymany qaıta qalpyna keltirý arqyly 34,7 mln tekshe metr aǵyn sýmen qamtamasyz etýge múmkindik berilmek. Nátıjesinde, jylyna qosymsha 3755 mln teńgeniń aýyl sharýashylyǵy ónimi óndirilip, 1 500 jańa jumys orny ashylady. 189,7 mln tekshe metr aǵyn sý tapshylyǵyn sheshýge qol jetkiziledi.
