Túrkistanda sý tasqynynyń aldyn alý sharalary pysyqtaldy
TÚRKІSTAN. QazAqparat – Túrkistan qalasy eldimekenderinde sý tasqynynyń aldyn alý sharalary pysyqtaldy. Óńirdiń tótenshe jaǵdaı qyzmetkerleri «Túıe asty» jáne «Shaǵa» aýyldarynyń mańaıyndaǵy sý basý yqtımaly bar aýmaqta daıyndyq jumysyn júrgizdi, dep habarlaıdy QazAqparat tilshisi.
Qala ákimi Rashıd Aıýpov qatysqan sharada jergilikti tótenshe jaǵdaılar departamenti ókilderi men jaýapty mamandar daıyndyq deńgeıin kórsetti. Sý tasqyny bolǵan jaǵdaıda atqarylýy tıis is-áreketterdi pysyqtap, arnaıy jattyǵý ótkizdi.
Aıtyp kelmeıtin apattyń aldyn alý men gıdrotehnıkalyq qurylǵylar jáne aryq drenaj júıesiniń daıyndyǵy tekserildi. Jaýapty mamandar men sala basshylarynyń sózine sensek, aımaqtaǵy jaǵdaı birqalypty, bári qatań baqylaýǵa alynǵan. TJD qyzmetkerleri kóktemgi qyzyl sýmen kúreske tyńǵylyqty daıyndalǵanyn kórsetti.
Sondaı-aq, aldyn ala ázirlengen janarmaı, sý jolyn bógeý zattarynyń qory, eldi mekenderdegi aryqtardy tazalaý barysy týraly baıandaldy.
Qala ákimi Rashıd Aıýpov osy salaǵa jaýapty mamandar men tótenshe jaǵdaılar qyzmetiniń jaýapkershiligin eskertti.
