Túrkistanda sport sańlaqtary marapattaldy
TÚRKІSTAN. QazAqparat – Túrkistan qalasynyń ákimi Rashıd Aıýpov óńir sportynyń damýyna eleýli úles qosyp júrgen sportshylar men bapkerlerdi qabyldap, marapattady. Qala ákimi olarǵa aldaǵy ýaqytta sport alamanynda qarsylas shaq keltirmeı, jeńis tuǵyrynan kórinýge tilektestik bildirdi, dep habarlaıdy QazAqparat tilshisi.
Kezdesý barysynda shahar basshysy túrli deńgeıdegi dodalarda baǵyn synap, el namysyn qorǵap júrgen jastarǵa sáttilik tiledi.
«Erteńgi úmitimiz, bolashaǵymyz sizdersizder. Baıraqty básekelerde namysty qoldan bermeı, abyroı bıiginde bolyńyzdar. Bekzat týǵan topyraqta taǵy da álemdi moıyndatar chempıondar shyǵaryna senimdimin. Barlyǵyńyz da qurmetke laıyqtysyzdar. Álemdik jarystarda Kók baıraǵymyzdy jelbiretip, Ánuranymyzdy shyrqatý baqyty buıyrsyn» ,- dedi Rashıd Abatuly.
Sondaı-aq, dzıýdoshy Aıdar Arapov pen samboshy Moldash Kemelbekke, boksshy Bek Nurmaǵanbetke alǵys hattar tapsyrdy. Bul sportshylar talaı saıystarda bási bıik ekendigin dáleldep, álemniń túkpir-túkpirinde ótken jarystardan júldesiz oralmaǵan kil myqtylar.
Aıta keteıik, Túrkistan topyraǵynan shyqqan Ábdisalan Nurmahanov, Oktıabr Jarylqapov, Haıs Aqqalıev, Bekzat Sattarhanovtar sport áleminiń ańyz adamyna aınalǵan tulǵalar. Búgingi kúni kıeli óńirdiń tól perzentterin úlgi tutyp, jetistigimen shahar mereıin ústem etip júrgen sportshylar jeterlik. Oblystyq, respýblıkalyq tipti halyqaralyq dodalarda top jaryp júrgen saıypqyrandar – el maqtanyshtary.
