Túrkistanda «smart» kottedjder salynady
TÚRKІSTAN. QazAqparat - Túrkistanda «aqyldy» úıler salyný kózdelip otyr, dep habarlaıdy QazAqparat oblys ákiminiń baspasóz qyzmetine silteme jasap.
Túrkistan oblysynyń ákimi Janseıit Túımebaev frantsýzdyq Logelis GROUPE qurylys kompanııasynyń basshylyǵymen kezdesti. Basqosýda sheteldik kompanııa basshylyǵy ákimge oblys ortalyǵy - Túrkistan qalasynda ınnovatsııalyq tehnologııalarmen jasalǵan kottedj úılerdi salý jobasyn usyndy.
«Aqyldy» úıler elektr qýatyn únemdep, paıdalanýshyny, meılinshe, artyq shyǵynǵa ushyratpaıdy ári baspana baǵasy qymbat emes baǵamda qarastyrylǵan. Investorlar «smart» úılerdi shahardaǵy ındýstrıaldy aımaqtan jer alyp, sonda qurastyryp, jasaýdy josparlap otyr. Jylyna 1 myń úıge deıin jasap, salyp berýge daıar kompanııanyń bul jobasy respýblıkadaǵy eshbir aımaqta, ázirge júzege aspaǵan.
Sheteldik ınvestorlardyń usynysyndaǵy birqatar jeńildikter men artyqshylyqtarǵa qanyqqan óńir basshysy pılottyq joba retinde Túrkistanda 50 úıdi salýǵa bolatynyn jetkizip, óńir úshin tıimdi tustaryn zerdeleýdi tapsyrdy. Sonymen birge, jaýapty sala basshylaryna «Nurly jer», «7-20-25» baǵdarlamalarynyń sharttaryna sáıkes kelgen jaǵdaıda, tıisti jumystarǵa qosýdy júktedi.
