Túrkistanda sheteldikterdi tańǵaldyrǵan aǵash sheberi turady
ASTANA. QazAqparat - Túrkistan shaharynda ǵajaıyp týyndylarymen sheteldik týrısterdi tańdaı qaqtyrǵan aǵash sheberi turady, dep habarlaıdy «Habar 24».
Gaýharbek Kúnqojaev búginde ulttyq naqyshtaǵy boıaýy qanyq dúnıeler jasap, ony jas urpaqtyń boıyna sińirýde.
Gaýharbek Kúnqojaevtiń negizgi mamandyǵy mýzykant. Shymkenttegi burynǵy pedagogıkalyq óner ınstıtýtynyń baıan synybyn bitirgen. Biraq óz salasy boıynsha eki jyl ǵana jumys istepti. Keıin bala kúngi armany - ulttyq aspap jasaýdy qolǵa alǵan.
«Oǵan ekiniń biri dombyra jasap, ulttyq ónerdiń qunyn túsirip jibergeni sebep boldy», - deıdi ol.
Sońǵy 10 jyldyń kóleminde adamǵa oı salatyn salmaqty dúnıeler jasap júr.
«Dál mynadaı jumys shyǵarý úshin 1,5 jyl ýaqyt ketip qalady. Óıtkeni biri men birin baılanystyryp keltirý óte qıyn. Ol jerde oı týyndatý, baılanyspasa bundaı týyndy shyqpaıdy. Oıǵa kóp ýaqyt ketedi», - deıdi sheber.
Gaýharbek Kúnqojaevtiń aıtýynsha, árbir sheber mýzykant bolýy tıis.
«Jasaǵan dúnıeńniń boıynan ásem bir áýen tógilip tursa, kórgen adamnyń jany rahatqa bólenedi», - deıdi. Al jaqsy dúnıe jasaý úshin sapaly aǵash qajet. Sheber ony ózi týyp-ósken Syrdyń boıynan izdeıdi. Orman-toǵaıdy kezip, qýraǵan órik pen jańǵaq, úıeńki men qaıyń sııaqty aǵashtardy jınaıdy. Árbir dúnıesin ǵylymı izdenispen jasaıdy. Ony týyndylarynan da baıqaýǵa bolady. Sondyqtan bolar sheteldik týrıster sheberdiń qolynan shyqqan jádigerlerge qumar.
«Shetelden kep jatyr. Anglııa, Italııa, Gollandııadan mádenıeti jetilgen. Solar tańǵalyp, aınalyp turǵanda men suraımyn - «sizderde bar ma, mundaı jumys?» dep, olar tańǵalady «bizde joq bundaı jumys» dep tańǵalǵannan keıin, nege osyny shyǵarmasqa dep «Ónege óner» dep at qoıyp, qazir daıyndap jatyrmyn. Buny sahnalap sóıletý kerek, soǵan jumys istep jatyrmyn. Qarjy taýyp, aqsha tabaıyn degen mende joq. Meniń baılyǵym - ónerim!», - deıdi G. Kúnqojaev.
