Túrkistanda shekarashylar ansambliniń kontserti ótti
Kontsertte qazaqtyń dańqy kompozıtorlarynyń patrıottyq ánderi shyrqalyp, dáýlesker kúıshilerdiń kúıleri kúmbirledi.
El Táýelsizdiginiń 30 jyldyǵyna arnalǵan is-sharada «Táýelsizdik tolǵaýy» poezııalyq qoıylymy kórermen nazaryna usynylsa, folklor toby «Esil», «Yńǵaıtók», «Aq saýyt» kúılerin shertip, kópshilikti serpiltti. Sonymen birge shekarashylar ansambliniń kúmis kómeı ánshileri «Máńgilik el», «Úsh baqytym», «Otan», «Batyrlar urany», «Týǵan jerim», «Qazaqtyń jigitteri», «Kúzette» jáne ózge de patrıottyq ánderdi jurtshylyqqa tartý etti.
Kesh barysynda sheteldiń tanymal áskerı ánderi de áýelep, ansambldiń balet toby kontsertti bımen órnektedi. Qazaqtyń ulttyq mýzykalyq aspaptaryn dáriptep, tek jandy daýysta án shyrqaǵan ónerpazdarǵa túrkistandyq kórermen rızashylyqtaryn bildirdi.
Túrkistan oblystyq mádenıet basqarmasynyń basshysy Ázimhan Qoılybaev respýblıkaǵa tanymal ári asa talantty ónerpazdardan jasaqtalǵan ansambl ujymyna alǵysyn bildirip, jastardy otanshyldyqqa tárbıeleý jolynda sińirgen eńbekteri mol ekenin jetkizdi.
Shekarashylardyń Táýelsizdikti ulyqtaǵan óner keshi óte joǵary deńgeıde ótip, jańarǵan Túrkistannyń mádenı-rýhanı álemine oń serpin berdi.
