Túrkistanda sharýalarǵa ónimderin eksportqa shyǵarýǵa ruqsat berildi
TÚRKІSTAN. QazAqparat – Túrkistan oblysynda sharýalarǵa óz ónimderin eksportqa shyǵarýǵa ruqsat berildi. Bul týraly Túrkistan oblystyq aýyl sharýashylyǵy basqarmasynyń basshysy Nurbek Badyraqov aıtty, dep habarlaıdy QazAqparat tilshisi.
Nurbek Badyraqovtyń aıtýynsha, elimizdegi tótenshe jaǵdaıǵa baılanysty aýylsharýashylyǵy ónimderin syrtqa saýdalaýǵa shekteýlerge berilgen bolatyn. Endigi jerde bul shekteýler alynyp tastalǵanyn jetkizdi. Óıtkeni ońtústikte ósiriletin aýylsharýashylyǵy ónimderiniń kólemi ishki naryqty tolyq qamtyp, basym bóligi artylyp qalatyny belgili. Sondyqtan sala basshylary olardy kórshi el naryǵyna erkin tasymaldaý týraly kelisimge kelgen.
«Búginnen bastap taýar óndirýshiler shetelge bolsyn, ózimizdiń oblysaralyq naryqqa bolsyn ónimderin tasymaldaýǵa, satýǵa eshqandaı kedergi joq. Ol úshin aýmaqtyq ınspektsııalardaǵy memlekettik karantın ınspektorlardyń barlyǵyna arnaıy tapsyrma keldi. Ol taýar óndirýshilerdiń ónimderi shetelge ketken jaǵdaıda fıtosanıtarlyq sertıfıkat, al oblystarǵa jiberilse karantındik setrıfıkat beriledi»,- deıdi Nurbek Badyraqov.
Sonymen qatar aýylsharýshylyǵy ónimderin tıegen júk kólikteri jolda bógelmes úshin oblystyq basqarma arnaıy «Bizbirgemiz» logotıpin daıyndaǵan. Sala mamandarynyń sózinshe, bul belgiler fıtosanıtarlyq sertıfıkat alǵan taýar óndirýshilerge beriledi. Onyń ústine mundaı belgisi bar júk kólikterin tranzıttik jolda da kóp toqtatpaıdy.
