Túrkistanda sharýalardy qoldaýǵa arnalǵan saýda úıi ashylady
TÚRKІSTAN. QazAqparat - Búgin Túrkistan qalasynda oblys ákimi Ómirzaq Shókeev alǵash ret kásipkerlermen beıresmı kezdesý ótkizdi, dep habarlaıdy QazAqparat.
Jıynda aýyl sharýashylyq ónimderiniń kólemin arttyrý men qarqyndy baý sharýashylyǵyn damytý, egindik jerlerdi tıimdi paıdalaný men tamshylatyp sýarý júıeleri jaıy aıtyldy. Bordaqylaý alańdary men sý qoımalaryn salý týraly máseleleri kóterildi. Іsker azamattardyń usynys pikirlerin tyńdaǵan oblys ákimi óńirdi damytýǵa baǵyttalǵan kásipkerlerdiń bastamalary men jobalaryn qoldaýǵa daıyn ekendigin atap ótti.
«Memleket pen bıznestiń kúshin biriktirý arqyly ǵana jaqsy nátıjege qol jetkizýge bolady. Sizderdiń jumys barysyndaǵy usynystaryńyz ben pikirlerińiz mindetti túrde eskerilýi kerek. Biz naqty qoldaý kórsetýge daıynbyz. Biraq, biz sizderdiń aımaqtyń damýyna qandaı úles qosa alatyndaryńyzǵa kóz jetkizýimiz kerek», - dedi Ómirzaq Shókeev.
Óńir basshysy sondaı-aq, kásipkerlerdi óz ıdeıalary men jobalaryn belsendi túrde usynýǵa shaqyrdy. Oblys ortalyǵynyń damý josparlary týraly aıtty.
Túrkistan qalasynda sharýalardy qoldaýǵa arnalǵan arnaıy saýda úıi ashylatynyn jetkizdi. Osyndaı sharalardy toqsan saıyn ótkizip turý týraly usynysyn bildirdi. Óz kezeginde sharýalar shetelden keletin shıkizattardy jeńildetilgen baǵamen alyp, mamandar tapshylyǵyn sheshý qajettigin aıtty.
Jıyn sońynda Ómirzaq Shókeev nátıjeli sheshim qabyldaý úshin barlyq aıtylǵan suraqtar egjeı-tegjeıli zertteletinin jetkizdi.
