Túrkistanda shaǵyn jáne orta bıznestegi ónim kólemin ulǵaıtý jaıy talqylandy

TÚRKІSTAN. QazAqparat - Túrkistan qalasynda oblys ákiminiń orynbasary Meıirjan Myrzalıevtiń tapsyrmasymen «Bıznesti kóleńkeden shyǵarý, shaǵyn jáne orta bıznestiń ónim shyǵarý kólemin ulǵaıtý» taqyrybynda jıyn ótti. Bul jóninde óńirlik kommýnıkatsııalar qyzmetine silteme jasap QazAqparat habarlaıdy.

Atalǵan jıynǵa Túrkistan oblysynyń kásipkerlik jáne saýda basqarmasy, Túrkistan oblysy boıynsha memlekettik kirister, Statıstıka, Básekelestikti qorǵaý jáne damytý departamentteri, Túrkistan oblysynyń kásipkerlik palatasy, «Qazaqstan Halyq Banki» AQ, «Qazaqtelekom» AQ, «Qazpochta» AQ oblystyq fılıaldarynyń basshylary qatysty. Bıznesti kóleńkeden shyǵarý, shaǵyn jáne orta bıznestiń ónim shyǵarý kólemin ulǵaıtý boıynsha jyl basynan beri atqarylǵan sharalar men túıindi máseleler kóterilip, ony sheshý joldary talqylandy.

Kásipkerler tarapynan bıznesti kóleńkeden shyǵarý, shaǵyn jáne orta bıznestiń ónim kólemin ulǵaıtý úshin baqylaý-kassalyq mashınalaryn ornatý kerektigi aıtyldy. Sonymen qatar, qolma-qol aqshasyz tólemderdi qabyldaý tólem apparattaryn ornatý máselesi qozǵalyp, elektrondy saýda boıynsha azamattardy oqytý men jarnamalaý máselesi qarastyryldy.

«Statıstıkalyq málimetterge súıensek, 2019 jylǵy 1 qarashadaǵy jaǵdaı boıynsha Túrkistan oblysynda jumys istep turǵan shaǵyn jáne orta kásipkerlik sýbektiler sany ótken jylǵy tıisti kezeńge sáıkes merzimimen salystyrǵanda 13,4%-ǵa (141606) artqan. ShOK sýbektileriniń jalpy sanynda sharýa nemese fermer qojalyqtarynyń úlesi - 50,2% (71148), dara kásipkerler - 44% (62282), shaǵyn jáne orta kásipkerliktegi zańdy tulǵalar -5,8%(8176). 2019 jyldyń qańtar-maýsym aılarynda ShOB sýbektileriniń ónim kólemi ótken jyldyń osy kezeńimen salystyrǵanda 35,2%-ǵa (189 517 mln) artqan. 2019 jylǵy 1 shildedegi kórsetkish boıynsha jumyspen qamtylǵandar sany tıisti kezeńmen salystyrǵanda 11,4% (207706 adam) quraǵan» delingen habarlamada.

Jıyn qorytyndysy boıynsha, jergilikti atqarýshy organ, memlekettik kirister departamenti jáne kásipkerler palatasynyń qatysýymen kásipkerler arasynda baqylaý-kassalyq mashınasyn ornatý qajettigi jóninde túsindirý jumystary júrgiziletin boldy. «Qazaqstan Halyq Banki» AQ, «Qazaqtelekom» AQ, «Qazpochta» AQ oblystyq fılıaldary óz tarapynan jyl sońyna deıin tıisti sharalardy qabyldaıdy.