Túrkistanda shaǵyn fýtboldan premer-lıga bastaldy
TÚRKІSTAN. QazAqparat - Túrkistanda shaǵyn fýtboldan premer-lıga bastaldy, dep habarlaıdy QazAqparat oblys ákiminiń baspasóz qyzmetine silteme jasap.
«Jýyrda Túrkistan oblysy ákiminiń esep berý jıynynda jastardyń bireýi óńir basshysyna jasóspirimder men jastar arasynda fýtboldan jarys ótkizý jóninde usynys aıtqan bolatyn. Janseıit Túımebaev jurtshylyq aldynda bul bastamaǵa qoldaý kórsetetinin ári jarystyń ashylý saltanatyna arnaıy baratynyn málimdegen-di. Ýáde oryndaldy» delingen habarlamada.
Keshe Túrkistan qalasynda jańadan ashylǵan Jastar resýrstyq ortalyǵynyń sport alańynda fýtboldan oblys ákiminiń júldesine arnalǵan qala chempıonaty bastaldy. Dúbirli básekege Túrkistandaǵy shaǵynaýdandar men eldimekenderden 30 komanda qatysýǵa qulshynyp otyr. Aýla klýbtary arasyndaǵy jarystyń ashylý saltanatyna oblys ákimi Janseıit Túımebaev arnaıy qatysyp, qatysýshylarǵa sáttilik tiledi.
«Jasóspirimder men jastar sportpen shuǵyldanyp, úırimelerge qatysyp júrse, jaman ádetterden aýlaq bolady. Aýla klýbtary arasyndaǵy bul chempıonat buqaralyq sportty damytýǵa serpin beredi dep senemin», - degen ol Túrkistanda zaman talabyna saı sport keshenderi men mektepter kóbeıetinin aıtty.
Shaǵyn fýtbol dodasy birneshe aıǵa deıin sozylady. Sportsúıer qaýym buny Túrkistan qalasynyń kishigirim premer-lıgasy dep te baǵalaýda. Oblys ákimdiginiń qoldaýymen ótip jatqan týrnır jeńimpazdary men júldegerlerine, úzdik oıynshylaryna baǵaly syılyqtar tapsyrylady. Aldaǵy ýaqytta Túrkistanda sporttyq saıystar sany artady. Bul óz kezeginde jasóspirimder arasyndaǵy quqyqbuzýshylyqty azaıtady degen senim bar.
