Túrkistanda shaǵyn avtobýs terezesine beti jabysqan balaǵa qatysty ákim túsinik berdi
TÚRKІSTAN. QazAqparat – Túrkistanda baǵyttaǵy kóliktiń terezesine beti jabysyp qalǵan balaǵa qatysty kórinisti qala ákimi túsindirip ótti. Shahar basshysy Rashıd Aıýpov oblys ortalyǵynda áli de qoǵamdyq kólikter jetkiliksiz ekenin aıtady, dep habarlaıdy QazAqparat tilshisi.
«Qalada qoǵamdyq kólikterdiń jetispeýshiligi problemasy bar. Sebebi, qazir bir ǵana «Jolaýshy» seriktestigi jolaýshylar tasymaldaýmen aınalysady. Biraq bul másele qazirgi tańda birtindep sheshimin taýyp keledi. Atalǵan seriktestik, avtoparkin jańartyp jatyr. Jyl basynda 16 avtobýspen tolyqqan bolsa, endi olardyń qataryna Qytaıdan ákelingen «Yutong» markaly 5 avtobýs qosyldy»,- dedi Rashıd Aıýpov.
Shahar basshysynyń sózinshe, «Jolaýshy» JShS-niń jańalyǵy munymen taýsylmaıdy. Seriktestik «Túrkistan» áleýmettik kásipkerlik korporatsııasymen» birlesip jumys isteý arqyly, jyl sońyna deıin Qazaqstanda jasalǵan «Saryarqa AvtoProm» avtozaýyt bazasynan sý jańa 36 avtobýsty satyp almaqshy.
Eske salaıyq, demalys kúni beti №6-shy baǵdardaǵy kóliktiń terezesine jabysyp qalǵan balanyń kórinisi áleýmettik jelilerge tarap ketken bolatyn. Ony janynda ótip bara jatqan kóliktiń jolaýshysy túsirip alyp, jelilerge salyp jibergen. Bul kóriniske baılanysty oqyrmandar tarapynan ár túrli pikirler jazylýda. Biri muny qoǵamdyq kólikterdiń jetispeýshiliginen dep túsindirse, endi biri qandaı jaǵdaı bolmasyn mektepke bara jatqan balaǵa aıaýshylyq tanytqan.
