Túrkistanda saýda oryndary qala syrtyna kóshiriledi
TÚRKІSTAN. QazAqparat - Túrkistan qalasynda saýda oryndary qala syrtyna kóshiriledi. Bul týraly shahar ákiminiń baspasóz qyzmetinen málim etti, dep habarlaıdy QazAqparat.
«Túrkistan qalasynyń aýmaǵynda jalpy 9 bazar, 8 saýda qatary qyzmet etýde. Onyń ishinde, 5 ámbebap, 3 azyq-túlik, 2 kókónis jáne 7 azyq-túlik emes taýarlardy satatyn bazarlar men saýda qatarlary bar. Olarda 6 myńǵa jýyq saýda oryndary ornalastyrylǵan. Jalpy saýda alańy - 214971,2 sharshy metrdi quraıdy. Qalanyń sáýleti men qurylys josparlaryna sáıkes, saýda júıesiniń basym bóligi modernızatsııalaýdy qajet etedi. Túrkistan qalasynda saýda qyzmetin retteý jónindegi amaldardyń is-áreket algorıtmi bekitilip, birqatar jumystar atqarylyp keledi», - delingen ákimdik aqparatynda.
Búgingi tańda qoldanystaǵy saýda alańdaryn, bazarlar men saýda núktelerin bir júıege keltirý maqsatynda qala syrtynan qurylys materıaldaryn, kıim-keshek, azyq-túlik taýarlaryn saýdalaıtyn bazarlar úshin 50 gektar jer telimi belgilengen. Onyń ishinde 17 ga - Qyzylorda baǵytynan, 15 ga - Kentaý baǵytynan, 18 ga - Sháýildir baǵytynda. Jer ýchaskelerin zańdastyryp, retteý jumystary atqarylýda.
Atap ótilgendeı, búginde Qyzylorda jáne Sháýildir baǵytyndaǵy jerlerdi memleket qajettiligi úshin qaıtarý jumystary júrgizilýde.
Al Kentaý baǵytyndaǵy «Saýda keshenine» belgilengen alań tolyǵymen bos. Sondyqtan zamanaýı saýda alańyn salý maqsatynda qala ákimdiginiń 26 sáýir 2019 j №443 qaýlysymen «Túrkistan» ÁKK» Aktsıonerlik qoǵamyna Kentaý tas joly boıynan «Saýda kesheni» qurylysy úshin 15 ga jer telimi turaqty paıdalanýǵa berildi.
Osyǵan oraı, «Túrkistan» Áleýmettik kásipkerlik korporatsııasy mamandarymen kezdesip, bazarlardy uıymdastyrý alańyn ınfraqurylymmen qamtamasyz etý máselesi talqylandy. Prezentatsııalyq materıaldar daıyndalýda.
