Túrkistanda saýda ortalyǵynan 7 mln teńgeniń altyn buıymdaryn urlaǵan kúdikti ustaldy
TÚRKІSTAN. QazAqparat - Túrkistan QPB kezekshi bóliminiń 102 pýltine saýda ortalyqtarynyń birine belgisiz er adam kirip, qarý-jaraqpen qorqytyp, altyn buıymdardy alyp ketkeni týraly habarlama tústi. Jábirlenýshige keltirilgen shyǵynnyń jalpy kólemi shamamen 7 mıllıon teńgeni qurady, dep habarlaıdy QazAqparat oblystyq PD baspasóz qyzmetine silteme jasap.
Atalǵan faktini polıtsııa qyzmetkerleri QR QK-niń 192-baby «Qaraqshylyq» boıynsha SDTBT-ǵa tirkep, kúdikti adamdy izdestirýge kiristi.
Qaraqshylyq shabýyldyń tapa tal túste oblys ortalyǵynyń kóshesinde oryn alǵanyn eskere otyryp, Polıtsııa departamentinde tájirıbeli qyzmetkerler qatarynan jedel-tergeý toby quryldy. Jedel ýákilder qylmys ornyn muqııat qarap, beınebaqylaý kameralaryn zerttep, yqtımal kýágerlerden jaýap aldy. Polıtsııa ár aýla men kósheni aralady, qylmyskerdiń urlanǵan zattardy satýy múmkin lombardtar men satyp alýshylardy tekserdi.
Eki kúnnen keıin jedel sharalar barysynda arnaıy qurylǵan izdestirý tobynyń qyzmetkerleri kúdiktiniń izine tústi. Ony Kentaý qalasy kósheleriniń birinen ustady.
Kúdikti jumyssyz, Túrkistan qalasynyń turǵyny bolyp shyqty. Ustalǵan azamat polıtsııa basqarmasyna jetkizilip, ÝUI-ǵa qamaýǵa alyndy.
Tergeý barysynda anyqtalǵandaı, qaraqshylyq shabýyldan keıin kúdikti qalalyq joldar arqyly qashyp ketken. Jas jigit beınekameralar men izdestirýden qutylý úshin kıimin basqa kıimge aýystyryp alyp, taksıge otyryp Kentaý qalasyna
qaraı bet alǵan. Bul qaraqshylyq jasaǵan kúdiktini izdeýge eki kún jumsaǵan jedel ýákilderdiń jumysyn qıyndatty. Belgili bolǵandaı, kórshi qalada kúdikti lombardqa altyn buıymdardyń birin tapsyryp, al aqshasyn óz qajettiligine jumsaǵan.
Qazirgi ýaqytta Túrkistan QPB-nyń tergeýshilerimen qaraqshylyq shabýyl deregi boıynsha sotqa deıingi tergeý amaldary júrgizilýde. Urlanǵan altyn buıymdary aıǵaqty zat retinde tárkilenip alynyp, zańdy ıesine qaıtaryldy. Tergeý jalǵasýda.
Óz kezeginde qaraqshylyq shabýylǵa tap bolyp, altyndarynan aıyrylǵan turǵyn kúdiktini ustaýdaǵy polıtseılerdiń tııanaqty jumysyna alǵysyn bildirdi.
