Túrkistanda «Saryagash open - 2018» týrnıri bastaldy
ASTANA. QazAqparat - Túrkistan oblysy Saryaǵash aýdanynda «SARYAGASH OPEN» ashyq týrnıri ótti, dep habarlaıdy oblystyq ákimdiktiń baspasóz qyzmeti.
Birinshilik 3-4 qarasha kúnderi Kókterek kentinde ornalasqan «Altyn Bulak Golf & Health Resort» golf klýbynda uıymdastyrylýda. Týrnırge Reseı, Túrkııa, Ózbekstan, Qyrǵyzstan, Tájikstan elderinen kelgen oıynshylar baq synady. Jarysqa 21 jastan asqan shet elden kelgen jáne elimizdiń er azamat golfıstteri qatysty. Qazir týrnırge 48 qatysýshy jiberilip otyr.
Halyqaralyq jarystyń tusaýkeserinde sóılegen oblys ákimi Janseıit Túımebaev barlyq qatysýshylarǵa sáttilik tiledi.
«Búgin bastalǵan «SARYAGASH OPEN 2018» golf týrnıri Saryaǵash kýrort demalys aımaǵyn týrızm oshaǵy retinde kórshi elderge de nasıhattaıtyn shara bolmaq. Maqsaty - týǵan elge degen patrıottyq sezimderdi jas urpaqqa nasıhattaý, belsendi demalys jáne ekologııalyq týrızmdi damytý, oblysty týrıstik destınatsııa retinde qalyptastyrý. Endeshe sizderdi ótip jatqan «SARYAGASH OPEN 2018» golf týrnıri is-sharasymen shyn júrekten quttyqtap, barshańyzǵa baq-bereke, myqty densaýlyq tileımin. Atalǵan shara aldaǵy ýaqytta da dástúrli túrde ótip turatynyna senimimiz mol» - dedi Janseıit Qanseıituly.
Áýesqoılyq týrnır Sent-Endrıýs Koroldik Golf Klýbynyń erejelerine sáıkes jáne «Altyn Bulak Golf & Health Resort» jergilikti erejelerine sáıkes jeke Stroke play formatynda ótýde.
Týrnırde 1,2,3 oryndy ıelengen qatysýshylar estelik syılyqtarmen marapattalatyn bolady. Oıyn nátıjeleri teń túsken jaǵdaıda, úzdik oıyn kórsetken qatysýshy jeńimpaz atanady. Ózge de nomınatsııalar boıynsha úzdik oıynshylar uıymdastyrýshylar men demeýshiler tarapynan baǵaly syılyqtarǵa ıe bolady.
